Qidiruv

ot 1. Safardagi kishi; sayyoh.

Har shahardan har shaharga yuramiz, Bir musofir bizlar gado boʻlamiz. — Shirin bilan Shakar

Boy mehmonxonaga kirganda, musofir yostiqqa bosh qoʻyib uyquga ketgan, bahuzur yoʻl hordigʻini chiqarayotgan edi. — U. Ismoiliy, Saylanma

2. Boshqa yerdan kelgan yoki boshqa yerda yashovchi; kelgindi.

Bundan oʻn sakkiz yil burun bu qishloqning bir burchagida musofir bir temirchi boʻlar edi. — A. Qahhor, Sarob

Qizimni musofirga bermayman, deb qoʻyarmikan. — A. Qodiriy, Oʻtgan kunlar

3. s. t. Oʻzga, yot (el-yurt haqida).

— Rahmatli otam musofir ellarda mening nima boʻlishimni ham oʻylamaganmikan? — dedi Hoji xola. — M. Ismoiliy, Fargʻona t.o

Biz uzoq judolikdan keyin musofir yurtda uchrashgan aka-ukalardek quchoqlashib ketdik. — O. Yoqubov, Izlayman

ot Kim oʻzish, kim yaxshi natijalarga erishish uchun boʻlgan bellashuv.

Otish musobaqasi. Chopish musobaqasi. Musobaqa qilmoq

Suzish, shaxmat-shashka va sportning boshqa turlari boʻyicha musobaqalar oʻtkazilmoqda. Gazetadan. Paxtazorlarda ochiq-oydin kunlarning har daqiqasidan unumli foydalanish uchun musobaqa qizgʻin tus oldi. — Oʻzbekiston qoʻriqlari

ot 1. Xususiy kishilarga tegishli mulk va shu kabilarni pul toʻlamay, qisman yoki batamom davlat ixtiyoriga olish, umumlashtirish.

— Otamning butun mol-u mulki musodara qilindi, oʻzi onam va yosh ukalarim bilan birga surgun etildi, — dedi Qutbiya. — S. Ayniy, Qullar

Xonning buyrugʻi bilan Shernazarboy va boshqalar hibsga olindi. Mollari musodara qilinib, xonning xazinasiga kirdi. — J. Sharipov, Xorazm

2. Matbuotda chiqqan narsalarni taqiqlab yigʻishtirib olish.

Bu kitob chiqishi bilanoq chor hukumati uni darrov musodara qildi. — Gazetadan

ot ayn. Musofirchilik.

Musofirliklar oʻtdi. Yur, qaytaylik oʻz yurtga. — Oq olma, qizil olma

ot Musobaqada qatnashuvchi, musobaqa qatnashchisi.

Musobaqachilar boshqalarni oʻnlab odim orqada qoldiradilar. — A. Qodiriy, Obid ketmon

ot esk. Oʻzga yerlardan kelgan kishilar qoʻnadigan joy; mehmonxona.

Ellik tiyinga foytun kira qilib, bir musofirxonaga bordim. — M. Muhammadjonov, Turmush urinishlari

Karvonsaroy atrofidagi musofirxonalardan biriga joylashib olishgach bozori Qandahorga borishdi. — Mirmuhsin, Meʼmor