Қидирув

от 1. Кишиларга ўгит бўладиган, хулосали, кичик мажозий ҳикоя.

Крилов масаллари. Ўзбек халқ масаллари.

Тўпламда шоирнинг энг сара масаллари жамланган. — Газетадан

2. эск. кт. Матал; мақол.

Куйида мен тош бошимни урмаган остона ёʻқ. Элда бор шундай масал: жон чекмасанг, жонона ёʻқ. — Э. Воҳидов

от 1. Муҳокама, мунозара билан ҳал этилиши лозим бўлган нарса, иш, вазифа, муаммо.

Уй-жой масаласи. Иқтисодий масала. Ҳаёт-мамот масаласи. Масалани ҳал қилмоқ.

Қўйилган масала икки кун давом этган семинар йиғилишида атрофлича муҳокама қилинди. — Н. Сафаров, Оловли излар

Икки чол ўзларини ташвишга солган муҳим масалага ҳам жавоб топмаганлар. — М. Исмоилий, Фарғона тонг отгунча.

2. Баҳс, муҳокама, мунозара ва шу кабилар мавзуи.

Масала яна хат устига ўтиб, Отабек қушбегидан сўради: — Қўлингиздаги мактуб билан, эҳтимол, биз оқланган чиқармиз? — А. Қодирий, Ўтган кунлар

Кампир бўлсак ҳам, мажлисга масала бўлиб ўтирибмиз. — А. Мухтор, Опа-сингиллар

Нотиқ Ўрта Осиёда туб олтин конлари ва уларни ўрганиш масалалари устида тўхталди. — С. Кароматов, Олтин қум

3. Умуман, бирор шахс ёки нарса билан боғлиқ бўлган, назар-эътиборда турган иш, гап ва шу кабилар.

Ҳозиргина ўйлаб турган жўнаш масаласи ҳам унинг эсидан чиққан эди. — А. Қодирий, Ўтган кунлар.

— Бунинг масаласи осон, оқсоқол, — деди Содиқ аминга, унинг ўйга толиб турганини кўриб. — М. Исмоилий, Фарғона тонг отгунча

Эртагаёқ масалангизни деканатга қўямиз. — Ў. Ҳошимов, Қалбингга қулоқ сол

Механизатор кадрлар тайёрлаш масаласи кенг ёʻлга қўйилган. — Ўзбекистон қўриқлари

4. мат. Маълум сонлар ва тегишли муносабатлар асосида номаълум сонларни топиш ҳақидаги математик вазифа.

Масалалар тўплами.

Доскага бир масала ва иккита мисол ёзилгач, баъзи билағон болаларнинг чеҳраси ёришиб кетди. — Ф. Азизхўжаев, Яшил чайла

Масалани тўғри ечди-ю, оққа кўчираётганда, вақт тугаб қолди. — Ў. Ҳошимов, Қалбингга қулоқ сол

5. Диний мавзудаги тортишув, мунозара ёки ваъз.

Масала айтишмоқ.

Нима учундир

[Ҳусайн Бойқаро] шайхулисломдан шариатга доир бир масалани сўради. — Ойбек, Навоий

крш. с. Фикрнинг тасдиғи учун келтириладиган факт, мисол олдидан қўлланади; мисол учун, чунончи, жумладан.

[Раҳмат:] Ўтиришга бегона кишилар ҳам айтилса мумкинми, озор чекмасмисиз? Чақирилганда ҳам ўзимизга яқин ва аҳил кишилар бўлур. Масалан, Мирзакарим қутидор каби. — А. Қодирий, Ўтган кунлар

Баъзи жиҳатдан, масалан, илдамликда бу йигитни ўзидан устун кўрди. — Ойбек, Танланган асарлар.

от айн. Масалнавис.

Машҳур масалчи И. А. Крилов бировникида ижарада турар экан. — Шарқ юлдузи

от 1. Умуман, бирор таом, егулик тайёрлаш учун ишлатиладиган нарса.

Қани, Олтиной билан Латофатхонга масаллиқ беринг, қийма тайёрлашсин. — Ё. Шукуров, Уч савол

Бироқ хамир таомларнинг асосий масаллиғи буғдой уни ҳисобланади. — К. Маҳмудов, Ўзбек тансиқ таомлари.

2. Овқат пишириш учун зарур бўлган, керакли миқдордаги маҳсулот.

Бир ошлик масаллиқ. Янгамнинг ошини ширин қилган акамнинг масаллиғи. — Мақол

— Масаллиқ яхши: ўша гўшт, ўша гуруч — деди Элчибек, — лекин овқатни оғизга олиб бўлмайди. — А. Мухтор, Туғилиш