Qidiruv

ot 1. Egallash, yoʻq qilish, qaytarish va shu kabilar maqsadda harakat qilish; shunday maqsaddagi harakat, urinish; hamla.

Ayollar tosh, gʻisht parchalarini koʻtarib, eshik va derazalarga hujum qila ketdi. — Oybek, Tanlangan asarlar

Shu payt qoʻqqisdan ikkinchi burgut ham hujumga oʻtdi. Oqsoq toʻngʻizcha anchagacha chiyillab turdi, soʻng ovozi tindi. — Fan va turmush

Rahim itining olgʻirligi, qoʻy podasini qanday qilib boʻrining hujumidan qutqargani haqida maqtana ketdi. — H. Nazir, Soʻnmas chaqmoqlar

2. harb. Biror hududni zabt etish, dushmanni yoʻq qilish uchun texnika va shu kabilar bilan harakat qilish, tashlanish.

Hujumga oʻtmoq. Dushman hujumini qaytarmoq. Havo hujumi.

Bombardimonchilarning hujumi oʻn besh minut davom etdi. — I. Rahim, Chin muhabbat

Dushman qanchalik gangitilsa hujumning muvaffaqiyati shunchalik muqarrar boʻladi. — A. Qahhor, Oltin yulduz

Oʻrmon yaqinida shox-shabba bilan yashirilgan ikkita dushman tanki hujumga shay turganligi haqida xabar keltirishdi. — Gazetadan

3. sprt. Qarama-qarshi tomonli sport oʻyinlarida raqibning himoyasini yengish, himoya nuqtasini ishgʻol etish uchun tashlanish harakati.

Ketma-ket boʻlgan hujumlar oʻz natijasini berdi: futbolchilarimiz raqib darvozasiga javobsiz ikki toʻp kiritdilar. Boksda hujum bilan birga himoyani ham esdan chiqarmaslik kerak.

Uning raqibi shohni hujumdan mudofaa qilish uchun uzoq oʻylanib qoldi. — I. Rahim, Chin muhabbat

4. koʻchma Tanbeh, haqorat qilish, soʻkish va shu kabilar bilan kimsaga tashlanish; hamla.

Xushroʻy chodirdan chiqmasdanoq, choy tashib, xizmat qilib yurgan kundoshiga kesatiq bilan hujum boshlaydi. — A. Qodiriy, Oʻtgan kunlar

Shuning uchun Ubaydulla aka har bir masalada kuyovining yonini olar, xotini sal gʻinshiy boshlasa, darhol hujumga oʻtardi. — Oʻ.Usmonov, Sirli sohil

5. koʻchma Biror katta ish yoki tadbirni amalga oshirishga qaratilgan umumxalq harakati.

Savodsizlikka qarshi hujum. Paranjiga qarshi hujum.

Mashinalar ishlayotgan joyda choʻlga qudratli hujum boshlanganligi sezilib turibdi. — R. Fayziy, Choʻlga bahor keldi

ot 1. harb. Dushman ustiga bostirib boruvchi, hujum qiluvchi.

Hujumchi tankchilar. Hujumchi uchuvchilar.

Komilov rotadan oʻttiz jangchini tanlab oldida, har biri oʻn kishidan uchta hujumchi gruppa tuzdi. — Guliston

2. sprt. Komandaning hujum chizigʻida oʻynovchi sportchi; zid. himoyachi.

Bolalar koʻchani boshlariga koʻtarib, changitib, toʻp tepishardi. Ular tarafma-taraf boʻlib olishgan, ikki tomonning darvozaboni, hujumchi-yu himoyachilari bor. — R. Fayziy, Hazrati inson

Bu toʻpni oltinchi minutda hujumchi B. Ibrohimov kiritdi. — Gazetadan

sft. 1. Hujum qiluvchi, hujum bilan harakatlanuvchi (hujum — toʻgʻri va koʻchma maʼnoda).

Xurramov boʻlinmasi hujumkor gruppalar bilan dushmanning oʻq olmas joylarini portlatishi kerak edi. — Nazarmat, Joʻrlar baland sayraydi

Hujumkorlar qancha koʻpaysa, choʻl shuncha tez chekinadi. — Gazetadan

Dushman jang bilan chekinar, lekin biron marrada hujumkorlarimizni toʻxtatib qolishdan ojiz edi. — N. Safarov, Olovli izlar

2. Hujumga asoslangan, hujum bilan xarakterlanuvchi (ish-faoliyat kabilar haqida).

Komandalar oʻtgan davr mobaynida koʻpgina qiziqarli, hujumkor futbol oʻyinini namoyish qilib, muxlislar qalbiga olam-olam quvonch bagʻishladilar. — Gazetadan.

ot Hujumkor harakat; ish-harakatdagi hujumkor ruh.

Baʼzi futbol jamoalari oʻyinida hujumkorlik yetishmaydi.

Ayrim jamoat tashkilotlari jamiyatga zararli xatti-harakatlarga qarshi haqiqiy hujumkorlik kurashi olib bormayaptilar. — Gazetadan

ot Xakerlar tomonidan kompyuter tarmogʻiga yoki tizimiga zarar etkazish yoki yoʻq qilishga boʻlgan urinish.