Qidiruv

1. Bundan bir oz ilgari; boya.

— Kanon kelding? — Hali keldim. Hali shu yerda edi. Hali kelib ketgan edi.

— Uylaringda kim bor? — Hali kirganimda, dadam bilan Yoʻlchi akam bor edi. — Oybek, Tanlangan asarlar

Men hali uni qoʻshningiz uyidan chiqqan holda koʻrgan edim. — A. Qodiriy, Oʻtgan kunlar

2. Koʻp vaqt oʻtmasdan, yaqin orada; halizamon.

Hali kelsa koʻrarsiz, Kula-kula oʻlarsiz (maymun). — Topishmoqlar

Hali oʻgʻillarim ham moldan kelib qolishadi. — Mirmuhsin, Meʼmor

3. Ish-harakat, holatning amalga oshmagan, belgining, belgi-holatning toʻliq darajaga yetmagan vaqtini bildiradi; hozircha.

Tong otishiga hali vaqt erta. Hali xomsan — pisharsan, Bu damingdan tusharsan. — Maqol

Quyosh botgan, lekin kun hali yorugʻ, har yoqqa oqshom sukunati choʻzilgan. — Oybek, Tanlangan asarlar

Alisher oʻyin-qaroqligi tutdi-yu, hali qurib ulgurmagan nam etikchasini kiya solib, hovliga tushdi. — Oʻ. Usmonov, Sirli sohil

— Toʻpqayragʻochga yaqin qoldimi? — Hali bor. — Oybek, Tanlangan asarlar

4. yukl. Taʼkid, kuchaytiruv bildiradi.

Voy sharmandalar, hali qochirib yubordik denglar-a. — N. Fozilov, Diydor

Sen pismiqni, hali shoshmay tur — E. Raimov, Ajab qishloq

— Hali shunaqami! — dedi va eshikni zarda bilan yopib chiqib ketdi. — Mushtum

Oshni damlab, hali oʻtiribman, hali oʻtiribman — A. Qahhor, Qoʻshchinor chiroqlari

5. Takror holda qoʻllanib, ayiruvchi bogʻlovchi vazifasida kelib, “goh goh“, dam dam maʼnolarini bildiradi.

— Fargʻonaga borgunimizcha hali Shukrullo, hali Mirmuhsinning tanishlari topilaversa, bu yaqinda manzilga yetolmaymiz, — deb Said Ahmad hazillashdi. — Shukrullo, Javohirlar sandigʻi

ot 1. Kishiga qattiq botmaydigan, muloyim, yoqimli (tovush, muomala va shunday muomalali kishi haqida).

Halim muomala.

Suv tepasida odamlar oʻt boʻlib yonadi, boshqa vaqtlarda eng sokin, eng halim odamlar, suv boshida janjal chiqsa, soʻz va dalil oʻrniga musht bilan, ketmon koʻtarish bilan ish koʻrishga tirishadilar. — Oybek, Tanlangan asarlar

Bir-ikki daqiqa sukutdan soʻng Saidahmadxon sunʼiy tabassum, halim ovoz bilan soʻz boshladi. — Oybek, Ulugʻ yoʻl

Har gapidan, harakatidan gʻurur aks etadi. Muomalada halim. A. — Qahhor, Sarob

Umar qishloqqa koʻchib kelgan kezlari yumshoq supurgiday halim yigit edi. — Mushtum

2. Halim (erkaklar ismi).

sft. 1. 1 Bundan sal ilgari tilga olingan, boʻlgan shaxs, narsa oʻrnida qoʻllanadi, unga ishora qiladi; boyagi, oʻsha.

Haligi mashina kimniki? Haligi kelgan kim edi?

Atrofimga alanglasam, haligi sheriklarim ham ketib boʻlishibdi. — S. Siyoyev, Yorugʻlik

Yoʻlchi oʻz manziliga qaytib, pichan toʻshakka choʻzilarkan, haligi yerdan yana nogʻora taraqladi. — Oybek, Tanlangan asarlar

Haligi yurak oʻynogʻisi tagʻin ham kuchaydi A. — Qodiriy, Oʻtgan kunlar

2. Aytilmoqchi boʻlgan shaxs, narsa haqidagi soʻz, gap yodga kelmay turgan paytda xuddi shu holatni qayd etish uchun qoʻllanadi.

Daladan qaytayotsam, haligi, otini esdan chiqardim, anavi Toshtemirning togʻasi duch keldi. — Yoshlik

Haligi, oti qursin, Malikboyning maydonida! — A. Qodiriy, Oʻtgan kunlar

— Haligi, aytmoqchi, chaqasi nima boʻladi, — dedi oshxona mudiri — Mushtum

Sal keyinroq;

1. Meʼyordagi, moʻljaldagi vaqt kelmay, undan avvalroq; hozirdanoq.

Sen halitdan qoʻrqib, yuraging yorilib, har nima deyaverding, nima balo boʻldi — Ravshan

Halitdan qoʻliga bigiz-soʻzan bersang, ezilib qoladi, deb oʻylardi u. — M. Osim, Tilsiz guvoh

Halitdan koʻz yoshi toʻksang, hamshaharingni koʻrganda, dod solib yigʻlar ekansan-da?0. Yoqubov, — Izlayman

2. Bundan bir oz ilgaridan; boyadan.

Halitdan beri bularning gaplariga quloq solib, jimgina oʻtirgan Norboy gapga aralashdi. — M. Xayrullayev, Tilla marjon

Yaqin vaqt ichida, yaqin orada; tezda (inkor mazmunli gaplarda qoʻllanadi).

Mahkam aka ham hali-beri turadigan holatda emas edi. — R. Fayziy, Hazrati inson

Havoning avzoyiga qaraganda, hali-beri tinadiganga oʻxshamasdi. — Oʻ. Hoshimov, Nur borki, soya bor

Toʻgʻrisi, Marhamatning oʻziga qolsa ham, hali-beri qaytgisi yoʻq edi-ya, faqat havoning oʻzgargani uni oʻylatib qoʻydi. — H. Nazir, Soʻnmas chaqmoqlar