sft. 1. Qazilgan, oʻyilgan yoki tabiiy chuqurlik, oʻyiq; oʻra.
Birovga chuqur qazisang, oʻzing yiqilasan. — Maqol
Bu axlatlarni tezda shupurib, bir chuqurga toʻkib, ustidan tuproq tortib — A. Qodiriy, Kichik asarlar
Koʻchat keltirib, chuqurga qoʻyaman, tanasidan tutib turaman, Yaxshiboyev oʻrtasiga tuproq tortadi. M. M. — Doʻst, Lolazor.
2. sft. Sathdan ancha past; choʻnqir, teran.
Chuqur daryo. Chuqur hovuz. Chuqur jarlik.
Binoning rangi uniqib ketgan, koʻhna yogʻoch darvozasi oldidan chuqur ariq oqardi. — N. Aminov, Qahqaha
3. rvsh. Ichdan, oʻpkadan toʻlib-toshib chiqqan yoki oʻpkani toʻldiruvchi.
Qudrat tushimmi, oʻngimmi?! deb chuqur xoʻrsindi. — H. Nazir, Soʻnmas chaqmoqlar
Nigora chuqur nafas oldi. — Sharq yulduzi
Yaxshiboyev chuqur tin oldi. M. M. — Doʻst, Lolazor.
4. sft. koʻchma Har tomonlama keng, asosli, atrofli, teran.
Chuqur maʼno. Chuqur ilmiy tekshirishlar.
Olimning bu yillarda eʼlon qilgan maqolalari chuqur tahlilga ega ekanligi bilan ajralib turadi. — OʻTA
5. sft. koʻchma Kuchli; behad katta.
Chuqur qaygʻu. Chuqur sukunat.
Onaning koʻngliga chuqur gʻashlik choʻkkan. — Saodat
Tayyorlanayotgan taomlarning sifatidan ishchilar chuqur qoniqish hosil etishyapti. — Gazetadan
6. rvsh. Yuzadan ichkariga, ich-ichiga.
Chuqur botaverdi yurakka xanjar. — X. Davron.
7. rvsh. Mustahkam, qattiq.
Halima Nosirovaning beqiyos sanʼati, tabiiy va betakror ovozi xalqimiz qalbidan chuqur joy oldi. — Saodat
- Yelkamning chuquri koʻrsin Biror joyga hech qachon qadam bosmayman degan maʼnoda aytiladigan ibora. — Shu magazinni yelkamning chuquri koʻrsin, — deb jahl bilan chiqib ketdi [qiz]. — Yoshlik