фл. 1. Бурмоқ феълининг ўзлик ва мажҳул нисбати.
Ўнгга бурилмоқ.
Жаҳон ўрнидан турди-да, эшикка қараб бурилди. — Ёшлик
Извош кўчадан ўтгач, ўнгга бурилиб, тўхтади. — И. Раҳим, Чин муҳаббат
2. Ўгирилмоқ, ўгирилиб қарамоқ.
Қизча ёцираб, қовоғини солиб, тескари бурилди. — Ойбек, Қуёш қораймас
Ҳокимнинг кўзи хотин томонга бурилди. — М. Исмоилий, Фарғона тонг отгунча
Сигир ўқтин-ўқтин ёнига бурилиб, бузоқни ялар, пишилларди. — Ў. Ҳошимов, Қалбингга қулоқ сол
3. с. т. Араз қилмоқ, араз қилиб тумтайиб олмоқ.
Уят эмасми, келин? Кеча келдинг сурилиб, бугун кетгин бурилиб. — А. Қодирий, Ўтган кунлар
— Кўпинча сув ташийдиган одам топилмай, сувсиз ўтирамиз,— Нури яна бурилди. — Ойбек, Танланган асарлар
- Лаби бурилмоқ Йиғламсирамоқ. Бола онасига кўзи тушиши ҳамон, беланган оёқ-қўлини питиллатганча, бўшатишга уринди. Бироқ уддасидан чиқолмагач лаблари бурилиб, йиғлаб юборди. — Ёшлик