fl. 1. Belgi qoʻymoq; belgi, alomat qoʻyib, taniqli qilmoq, ajratmoq.
Islohotda oʻzimga tekkan yerni belgilab, qoziq qoqqanimda koʻp narsalarni moʻljallab qoʻygan edim. — A. Qahhor, Qoʻshchinor chiroqlari
2. Biror shartli alomat, ishora bilan ifodalamoq.
Nomaʼlum sonni x bilan belgilaymiz. Buyruq mazmunini undov belgisi bilan belgilamoq.
3. Biror xususiyati, koʻrinishi va shu kabilarga asosan aniqlamoq, farqlamoq.
Qirq yoshlardagi bir kishi kirdi. Qodir bu odamning aftidan kasb-korini belgilay olmadi. — A. Qahhor, Qanotsiz chittak
4. Oldindan chizib, rejalab, tayin qilib qoʻymoq.
Hukumatimiz Navroʻz kunini dam olish kuni etib belgiladi. — Gazetadan
Soat oltiga belgilangan toʻy soat oʻndan oshganda boshlanibdi. — A. Qahhor, Asarlar
Yigʻilish juda qisqa boʻlganiga qaramay, odamlar belgilangan vaqtdan ancha erta toʻplandilar. — S. Karomatov, Oltin qum
5. Biror maqsad uchun moʻljallamoq, tanlamoq, koʻzlab qoʻymoq.
[Hasanali] Minib ketish uchun Qutidorning saman yoʻrgʻasini belgiladi. — A. Qodiriy, Oʻtgan kunlar
Xolida ancha aylanib yurdi. It bogʻlaydigan joyni oʻzi belgiladi. — S. Ahmad, Saylanma
6. Ishga, mansabga qoʻymoq, tayinlamoq.
Direktor qilib belgiladi.
Musulmonqul qoʻy kabi yuvosh Toshkent hokimi Sarimsoqbekni oʻldirib, oʻrniga Azizbekdek zolimni belgiladi. — A. Qodiriy, Oʻtgan kunlar
[Husayn Boyqaro] Jilongʻorga Valibekni, Mirzoyi Kichik ham Islim barlosni sardor belgiladi. — Oybek, Navoiy