ot 1. Bir yoqadan bosh chiqarib birlashganlik; hamjihatlik, yakdillik.
Kuch — birlikda. Birlik bor — tiriklik bor. — Maqol
Hikmat — birlikda. — Maqol
2. Bir butunlik; umumiylik, mushtaraklik.
Oyimxon bilan uni [Elmurodni] samimiyat, ochiqlik, niyat-tilak birligi mahkam bogʻlar edi. — P. Tursun, Oʻqituvchi
Insonni kuchli qiladigan, uni bezaydigan narsa — maqsadi, toʻgʻrirogʻi, maqsadlar birligi! — X. Toʻxtaboyev, Shirin qovunlar mamlakati
Bola tarbiyasida maktab bilan oila oʻrtasida maqsad birligi boʻlishi lozim. — Gazetadan
3. Sanash, oʻlchash, hisoblash, qiyos qilish uchun mezon sifatida qabul qilingan kattalik.
Oʻlchov birliklari.
Elektr sigʻimining birliklari. — Fizika kursi
Biz yorugʻlik kuchini yoki tovush kuchini oʻlchaymiz, lekin hid kuchini oʻlchaydigan birlik yoʻq. — Gazetadan
Geokimyo tekshiradigan asosiy birlik — kimyoviy element va uning atomidir. A. — Ye. Fersman, Qiziqarli geoximiya
4. tlsh. Til sathlarining lisoniy kategoriyalari.
Til birligi. Lugʻaviy birlik. Frazeologik birlik. Nutqiy birliklar.
Nutq birligi boʻlgan soʻz, negiz, soʻzning maʼnoli qismlari oʻzgarmaydigan turgʻun hodisa emas. — OʻTA
Frazeologik birlik shoir tomonidan sheʼrning ritm, band, vazn, qofiya kabi vositalari talablariga boʻysundirilgan holda ishlatiladi. — OʻTA
- Birlik kategoriyasi yoki birlik son Shaxs yoki predmetning bittaligini bildiruvchi grammatik shakl.