от 1. Диний тасаввурларга кўра: фақат одам тириклигида, ҳаётида у билан бўладиган, вафотидан кейин тандан чиқиб, абадий мавжуд бўладиган ғайримоддий асос; руҳ.
Тирик мўминлар қарғишидан қўрқмасанг, марҳумлар арвоҳидан қўрқ. — Газетадан
Шу ерни обод қилинглар. Ҳар ҳолда ота юртинг. Отангнинг арвоҳи ҳам шод бўлади. — Ш. Холмирзаев, Бодом қишда гуллади
2. Марҳумнинг киши хаёлида кўринган шарпаси.
Севгувчи йигитни солмишдир ёʻлга, Тунда эртак айтган бир мудҳиш арвоҳ. — Ҳ. Олимжон.
Шайх арвоҳдек бесас, бепарво турарди. — С. Сиёев, Аваз
- Арвоҳ оши Ўтган ота-боболарнинг руҳига бағишлаб ўтказиладиган кичикроқ маърака, ёʻқлов. Султонбек сўз олди: Арвоҳ оши бермайман, ўғлимни туй қилмоқчиман, тўй дедим. — Ойбек, Танланган асарлар
- Арвоҳи пир ёки арвоҳ пири Устоз қўлида касб-ҳунар ўрганиб, мустақил иш бошлаш учун фотиҳа олаётган шогирднинг шу муносабат билан ҳамкасаба усталарга ва ўтган пирлар арвоҳини шод этиш мақсадида берадиган зиёфати. Бўлмаса, уста Олим ўз уйига дўкон қурибдир денг-чи! — Дўкон қурибдир. Арвоҳ пири бермасдан-а? — А. Қодирий, Ўтган кунлар
- Арвоҳ капалак Одатда, кечаси чироқ ёруғига келадиган йирик қўнғир капалак (ўлган кишининг руҳи ўз уйига гўё шу капалак суратида келармиш).
- Арвоҳ урди Ишнинг расво бўлиши, ёмон ҳодиса юз беришини руҳнинг ёмон таъсиридан кўришни билдиради. [Қози] Тавба қилдим, худо! [Мулладўст:] Арвоҳ урди, қози! — Ҳамза, Майсаранинг иши
- Оч арвоҳ ёки арвоҳга ўхшаган Жуда ориқ, қилтириқ; гўё жонсиздек кўринишли.