Поиск

rvsh. 1. Past tezlik bilan; sekin.

Shoqosim oʻrnidan turdi, etagining changini qoqib oʻz chaylasi tomon asta joʻnadi. — Oybek, Tanlangan asarlar

Toʻqay ustiga tun qorongʻiligi asta bostirib kelayotgan paytda, u qamishlar orasidan chiqdi. — S. Ahmad. Ufq

2. Past darajadagi tovush bilan; sekin.

Mirzakarimboy yana oʻshshayib tikildi, ammo maslahatgoʻylik bilan asta gapirdi. — Oybek, Tanlangan asarlar

3. Sezilar-sezilmas darajada, shunday xatti-harakat bilan, sekin.

Asta koʻzini ochmoq. Eshikni asta yopmoq.

Ahmad dik etib turib, yelkamga asta urib qoʻydi. — S. Siyoyev, Yorugʻlik

ot Kiyim yoki koʻrpa, koʻrpacha singari narsalarning ichki qavati, ichki tomoniga tikilgan material.

Boʻz astar. Koʻrpaning astari.

U chap qoʻlini siltab tortdi, keyingi siltashda toʻnining astari tirr etib yirtildi. — Yoshlik

sft. Kiyim astariga ishlatish uchun mos (mato haqida).

ot Astar qilishga yaraydigan; astarbop.

Astarlik chit. Astarlik gazlama.

rvsh. Sekinlik bilan, sekin-asta.

Kechga yaqin Gulnorning ruhi ancha yengillashdi, issigʻi ozaydi, nafas olishi ham asta-asta durustlashdi. — Oybek, Tanlangan asarlar

Qilar boʻlsa, nimalarnidir asta-asta soʻzlashib, piqir-piqir kulishardi. — Oydin, Kelin oʻgʻil tugʻdi

rvsh. 1. ayn. Asta.

Otlar oʻz-oʻzidan asta-sekin yurib ketdi. — A. Qahhor, Xotinlar

[Mastura Norga:] Axir, siz, qiziqsiz! Besh kun sabr qiling, kuyov-puyovga chiqsin, bir oy, yarim oy oʻtsin, undan keyin asta-sekin qashlab, ishga solaylik-da. — Hamza, Paranji sirlari

Asta-sekin boshlangan chapak tobora avj olib, soz ovozini bosib ketdi. — A. Qahhor, Qoʻshchinor chiroqlari

2. ayn. Asta-asta.

Uzoqdagi togʻ oraliqlaridan boshlangan qorongʻulik asta-sekin hamma yoqqa tarala boshladi. — A. Qahhor, Oltin yulduz

[Rahmatilla] Asta-sekin oʻzini oʻngʻardi, uy-joy qildi, xotin oldi. — A. Qahhor, Qoʻshchinor chiroqlari

3. Astalik bilan va davomiy tarzda. zid. jadal.

Folbinlik va gʻoyibdan bilish sirlarini ochishga olimlar asta-sekin yaqinlashib kelishyapti. — Fan va turmush