Қидирув

от 1. анат. физиол. Бош ва орқа миядан барча аъзоларга тарқалган ва уларнинг фаолиятини бошқариб турадиган жуда ингичка нерв томирлари тизими ва шу томирларнинг ҳар бири.

Ўзи ёш, асаблари бутун. — С. Зуннунова, Олов

2. Организм фаолияти ва инсон хатти-ҳаракатларини ўз ичига олган шундай тизимлар мажмуи.

3. Шу тизимлар мажмуининг ҳолати.

Бобошнинг таранг асаблари бўшашиб, енгил тортди-да — А. Мухтор. Бўронларда бордек ҳаловат

Гўзал манзара руҳингизни бардам, асабларингизни осойишта қилади. — Саодат

4. Асабий ҳолат.

Адолат асабдан титраб, бошини ушлаб, ўтириб қолди. — С. Зуннунова, Гулхан

сфт. 1. Салга асабийланаверадиган, бўлар-бўлмасга қизишиб, тутақиб кетадиган; зардаси тез, жиззаки.

Асабий киши. Асабий бола.

Отам асабий одам эди. Шундай бўлса ҳам, мени қаттиқ урмаган ва ёмон сўкмаган эди. — С. Айний, Эсдаликлар

2. Асабларнинг қўзғалиши билан боғлиқ.

Асабий ҳолат. Асабий товуш.

— Бегонадан ҳам баттарсиз! — қизишиб кетган Холисанинг лаблари асабий титради. С. — Нуров, Нарвой

Юзини асабий тимдалаётган онасининг аҳволига ачинибми, аёл жаҳлдан тушди. — Ёшлик

от 1. айн. Асаб.

Унинг асабиятга тегувчи сўзлари ҳар куни Саидийнинг еганини заҳар-заққумга айлантирар эди. — А. Қаҳҳор, Сароб

2. Асабий ҳолат; асабийлик.

[Ҳаким бойваччанинг] Ранги ўчган ҳаракатларида қўрқув ва асабият сезиларди. — Ойбек, Танланган асарлар

от Асабий ҳолат.

Элбек ўз кабинетига қайтгандан кейин асабийлик билан нари-бери юриб, узоқ ўйлади. — А. Мухтор, Туғилиш

от Асаб билан ўйнашиш.

Э, каттаконинг билан қўшмозор бўл, деб ўйлади Яхшибоев, бунақа асаббозликда соғайиб бўладими. — М. М. Дўст, Лолазор

фл. айн. Асабийлашмоқ.

— Нима қилай, қўлимдан келган бутун яхшиликни қилиб кўрдим, — чой ҳўплади Маҳмудов ва асабийланиб, титраб, ғазаб билан сўзида давом этди. — Ойдин, Кўнгил тўлдими, яхши йигит