fl. 1. Erishish, yetish va shu kabilarga sabrsiz intilmoq; oshiqmoq.
Avaz Yoshulli bilan olishib gaplasholmadi, raisning nega shoshayotganiga ham tushunmadi. — S. Siyoyev, Avaz
Yomgʻir aralash qor yogʻib turgan boʻlsa ham, u negadir shoshmas edi. — S. Zunnunova, Yangi direktor
— Rahmat, shoshib turibmiz, — dedi Melivoy. — F. Musajonov, Nozik masala
2. Tez, zudlik bilan bajarmoq; tez, ildamlik bilan harakat qilmoq.
Odamlarning shoshib yurishiga qaraganda, qormi, yomgʻirmi yogʻsa kerak. — E. Raimov, Ajab qishloq
Shoshib xatni yonidan chiqazib, qoʻliga berdi. — S. Ahmad, Ufq
Zargarov hali qayoqqa borishini bilmasa ham, shoshib, etiklarini kiydi. — A. Muxtor, Boʻronlarda bordek halovat
3. Toʻsatdan yuz bergan ish, hodisa tufayli hovliqmoq, hayajonlanmoq, esankiramoq.
Toʻsatdan mehmonlar kelib, shoshib qoldim. Shoshganda labbay topilmas. — Maqol
Qudrat esa bolalarning gapini tinglashini ham, atrofdagi boy manzaralarni koʻrib olishini ham bilmay, shoshib qolgan edi. — H. Nazir, Soʻnmas chaqmoqlar
- Aqli shoshmoq 1. Hayron qolmoq, ajablanmoq. Koʻrgazmaga kelganlarning u yerda-gi eksponatlardan aqli shoshadi;Ana shu yerga kelganda koʻplarning boshi gangib, aqli shoshib qoldi. — H. Gʻulom, Mashʼal
- Shoshma hali yoki shoshmay tur Qarab tur hali, mendan koʻrasan (doʻq, poʻpisa). Shoshma hali, peshonangdan otib, yerga choʻziltirmasam, odam bolasi emasman. — Oybek, Tanlangan asarlarSen oʻzboshimchani akamga aytib, adabingni berdirib qoʻymasammi, sen etaksiz, shoshmay tur — K. Yashin, Hamza