fl. 1. Koʻrmoq feʼlining oʻzlik nisbati.
Shahar uzoqdan koʻrinib turibdi. Shu kunlarda nega kam koʻrinasiz?
Boyagi sovchilar bu favqulodda muomalani koʻringan birovga doston qilib oʻqiydilar. — A. Qodiriy, Oʻtgan kunlar
Bu Kanizakning unga qiladigan har bir muomalasidan ochiq-oydin koʻrinib tursa ham bunga hech kim ahamiyat bermas edi. — A. Qahhor, Qoʻshchinor chiroqlari
2. Koʻz oldida namoyon boʻlmoq, paydo boʻlmoq.
Ostonada Qora Ahmad koʻrindi. — Oybek, Tanlangan asarlar
3. Tasavvur qilinmoq, tuyulmoq; oʻxshab ketmoq.
Ona Normatning boʻyiga tikilib qaradi. Kechagina maktabga qatnab yurgan bola bugun onaning koʻziga sher yigit boʻlib koʻrindi. — I. Rahim, Chin muhabbat
Avvallari bu ish [samovarchilik] hammaga biram erish koʻrindi, biram gʻalati tuyuldiki, bolam bechora Abror nomuslarga oʻldi. — A. Qahhor, Asror bobo
Yodgorning nazarida uy yanayam sovib ketgandek koʻrindi. — Oʻ. Hoshimov, Qalbingga quloq sol
4. Oʻzini shifokorga koʻrsatmoq, shifokor koʻruvidan oʻtmoq.
Biz uning betob boʻlganini eshitib, koʻrgani bordik doktorga koʻringanmi, yoʻqmi, soʻradik. — M. Ismoiliy, Inson husni
- Koʻzga koʻrinmoq 1. Tasavvurda gavdalanmoq, xayolda namoyon boʻlmoq. Shu savol boshiga kelganda, koʻziga toʻsatdan Kanizak koʻrinib, Sidiqjonning yuragi oʻynab ketdi. — A. Qahhor, Qoʻshchinor chiroqlariKoʻzga koʻringan olim.Mening ham bolam odam boʻldi, koʻzga koʻrindi. Yodgor. Harbiy toʻntarilishning birinchi kunlaridayoq koʻzga koʻringan bir necha artist, rejissyor, operator va aktyorlar halok boʻldi. — Gazetadan
- Koʻziga hech narsa koʻrinmaydi Asabiylashish, gʻazablanish va shu kabilar natijasida hech narsaga eʼtibor qilmaydi; hamma narsadan kechdi. Rahimberdining asablari oʻt boʻlib yondi, koʻzlariga hech narsa koʻrinmadi. — X. Toʻxtaboyev, Felyetondan soʻngMansurning oʻzi emasmidi, kunora xatingizni olmasam, hech nima koʻzimga koʻrinmaydi, degan? — Oʻ. Hoshimov, Qalbingga quloq sol