от 1. Шикастланган, синган, чиққан, яраланган жой; яра-чақа.
Оғир жароҳат. Енгил жароҳат.
Доктор назоратида, кунлар ўтган сари жароҳатдаги яллиғланиш қайтиб, оёғим ердан енгил кўчадиган бўлиб қолди. — Н. Сафаров, Оловли излар
Ғуломжон сўнгги зарбанинг оғир жароҳатидан узоқ вақтларгача тузала олмай юрди. — М. Исмоилий, Фарғона тонг отгунча.
Бир чол жароҳатимга кигиз куйдириб босди ва болдиримни латта билан боғлаб қўйди. — А. Қаҳҳор, Ўтмишдан эртаклар
2. кўчма Катта зарар, зиён-заҳмат.
Биз мисли кўрилмаган қисқа муддат ичида урушнинг оғир жароҳатларини тузатиб олдик. — Газетадан
3. кўчма Алам, изтироб.
Бу воқеа Элмуроднинг дилида оғир жароҳат қолдирди. — П. Турсун, Ўқитувчи
Мезбон ўзи билмаган ҳолда ҳазилга ёʻйиб айтган икки оғиз сўзи билан Йигиталининг юрагидаги жароҳатга тегиб кетганини сезмади. — Д. Нурий, Осмон устуни