sft.
1.
Somon, zarchuva, tilla kabi narsalar tusidagi rang.
Sariq ipak. Och sariq rang. Toʻq sariq.
Daraxtlardagi sariq barglar toʻkilib tugalgan, yer yuzi oʻzining qishki sariq kiyimini kiygan edi. — A. Qodiriy, Oʻtgan kunlar
2.
Malla rang, malla (soch, tuk, teri haqida)
Sariq soch.
Rustam uning uzun moʻylovi, koʻkish koʻzlarini qoplab olguday quyuq, sariq qoshlarini koʻrdi-yu, yuragi shuvullab, oʻzini orqaga tashladi. — Oʻ. Hoshimov, Qalbingga quloq sol
3.
ot
Tuxumning oqsil moddasi oʻrtasidagi qismi.
Tuxumning oqini oqlab ye, sarigʻini — saqlab. — Maqol
Tuxum pachaqlangan edi. Uning sarigʻi oqqa aralashib, chakkamdan sizib, yuzimga oqmoqda edi. — Gʻ. Gʻulom, Shum bola
4.
ot s.t.
Jigardagi jiddiy salbiy oʻzgarishlar tufayli teri, koʻz oqining sargʻayishidan iborat ogʻir va yuqumli kasallik nomi; gepatit.
Sariq kasalligi.
- Sariq irq Mongoloid irqining eskirgan nomi.
- Sariq kartochka
Materassi hakam tarafidan sariq kartochka bilan jazolandi. — Gazetadan
- Sariq matbuot
Ikkinchi jiddiy qusur shuki, koʻpchilik qalamkashlar bugun sariq matbuot sahifalarida eʼlon qilinayotgan oʻrtamiyona mashqlarni sheʼr, hikoya, deya ulardan andoza olib, ijod qilmoqdalar. — GazetadanShuning uchun ham koʻcha-koʻyda sariq matbuotning voqea izidan quvuvchi hikoyalariga odamlar oʻrganib boryapti. — Gazetadan
- Sariq palak
- Sariq suv
- Sariq sumalak 1. Qamish bilan yopilgan tom boʻgʻotlarida ilk bahorda yogʻingarchilikdan keyin hosil boʻladigan sargʻish sumalak;
— Qishdan qitday bor: hut-yut, sariq, sumalak, ayamajiz qatorlashib turibdi, — kulumsiradi Raʼno. — Oybek, Ulugʻ yoʻl
- Sariq chaqa 1. Chaqa (pul); juda oz miqdordagi, arzimas pul.
Mana, xotinim yotib qoldi, yostiqdan boshini uzishga darmoni yoʻq. Kissamda sariq chaqa yoʻqki, bechoraning ogʻziga yoqar ovqat bersam. — Oybek, Tanlangan asarlar;Ommani ergashtira olmagan rahbarning qadri — sariq, chaqa. — I. Rahim, Ixlos
- Sariq chaqalik (yoki chaqaga arzimaydigan) Hech narsaga arzimaydigan, bir pulga qimmat, arzimas.
— Soʻzni tangaday jaranglatib soʻzlashga ustasiz. Ammo hozirgi soʻzingiz puchak, sariq chaqaga arzimaydi, — dedi — Mirhaydar. Oybek, Oltin vodiydan shabadalar
