от 1. Текисликдаги жой, нарса, иншоот ва шу кабиларни масштаб бўйича батафсил тасвирловчи шартли белгилари бўлган чизма.
Бинонинг плани. Шаҳарнинг плани.
Геологлар шаҳарчасининг марказий кўчаси план асосида қайта қурилмоқда. — С. Анорбоев, Ўзбекистон олтини
Қишлоқнинг планини, кўчаларини, уйларини кўрдингиз. Мана бу кўча ҳозирги гўристоннинг бир чеккасидан ўтади. — А. Қаҳҳор, Қўшчинор чироқлари
2. айн. Режа 2.
Беруний тумани соҳибкорлари йиллик план бажарилганлиги ҳақида рапорт бердилар. — Газетадан
[Дилбар:] Пешқадам ишчи кунига пландаги 480 та ўрнига 650 тача рўмолнинг четини тикади. — Газетадан
3. эск. Бирор ишни амалга ошириш тартиби.
Саёҳат плани.
Солиҳ лабораторияга кириб, ўз жойига ўтирди-да, қилиниши керак бўлган тажрибалар планини туза бошлади. — О. Мўминов, Хиёбондаги уч учрашув
Қани, айт-чи, бирор мақсадинг, планинг борми ўзи ўйлаб юрган? — Т. Ашуров, Оқ от
4. эск. Бирор нарсани баён этишдаги муайян тартиб, изчиллик.
Диссертация плани. Лексия плани. Ҳикоя плани. Дарс плани.
Ўртоқ Обидов бу конспект эмас, план [деди Нишонов]. — С. Зуннунова, Янги директор
5. кино Обектнинг, масалан, кинокадрда суратга олинган майдоннинг тасвирдаги ўрни ва унинг катта-кичиклиги.
Олдинги план. Йирик план. Тасвирларни ўртача планда бермоқ. Юзни йирик планда суратга олмоқ.