ot 1. Biror ish, voqea-hodisa sodir boʻlgan yoki boʻladigan vaqt, fursat, on.
Tush payti. Uq otilgan payt.
Tongotar paytida Azizxon Qoʻshariq guzariga yetib keldi. — S. Ahmad, Ufq
Choy paytida Maqsuda onasiga koʻnglini bir oz ochishga jurʼat qildi. — S. Zunnunova, Olov
2. Muayyan sharoit bilan bogʻliq boʻlgan davr, zamon.
[Zargarov:] Jonim. Payt nozik, xotin-qizlar masalasi chirsillab turibdi — bekorga nobud boʻlib ketaman. — A. Qahhor, Ogʻriq tishlar
Yana jazo otryadining koʻziga qon toʻlib, kimga tegishini bilmay turgan nozik paytda bir kor-hol boʻlmasin deyman. Tagʻin oʻzingiz bilasiz — K. Yashin, Hamza
3. Biror ishni amalga oshirish uchun qulay vaqt, fursat, imkoniyat.
Payt topmoq. Paytni qoʻldan bermoq. Payt kelganda aytmoq.
Men payt poylab qochishni moʻljallab borardim. — H. Ahmar, Kim haq?
Oʻzi ham, payti kelib, mana shu qizlarday dugonalari bilan yayrab-yashnab, qiyqirib oʻynay olarmikan! — Oʻ. Hoshimov, Qalbingga quloq sol
- Payt ravishi
- Payt ergash gap Bosh gapdan anglashilgan harakat, voqea-hodisalarning yuzaga kelish paytini (vaqtini) bildiruvchi ergash gap. Bir kuni koʻchada ketayotsam, Umri bir bosh uzum koʻtarib kelyapti. — A. Qahhor, Asarlar
- Payt holi Ish-harakatning roʻy berish vaqtini bildiruvchi hol. Haydar ota bir kuni Ultarmaga borib, tegirmondan xabar oldi. — A. Qahhor, Asror bobo