Qidiruv

ot 1. Gʻoʻza oʻsimligining chigit va tolalardan iborat oppoq yumshoq hosili.

Uzun tolali paxta. Chigitli paxta. Chigitsiz paxta. Paxta terish. Eski paxta boʻz boʻlmas, asli dushman doʻst boʻlmas. — Maqol

U kechqurun tergan paxtasini tabelchiga oʻtkazib, yuvinib-taranib qishloqqa joʻnadi. — I. Rahim, Chin muhabbat

2. Chigitdan ajratilgan shu mahsulot; momiq.

Paxtadan ip yigirmoq.

Vaziraning egnida shaftoli guliga monand, koʻksi ochiq, yelkasiga paxta qoʻyib tikilgan shoyi koʻylak. — S. Ahmad, Ufq

Respublika paxta tolasi ishlab chiqarish boʻyicha dunyoda toʻrtinchi oʻrinda turadi. — Gazetadan

3. s.t. ayn. Gʻoʻza.

Uzoq-uzoqda hali kun koʻtarilmaganiga qaramay qoʻllariga ketmon ushlagan yigitlar paxta sugʻorib yuribdilar. — A. Qodiriy, Obid ketmon

4. sft. Guli, tasviri (ochilgan) paxtaga oʻxshash.

Qurbonov choʻntagidan yon daftarcha chiqardi: — Bu kishiga oʻttizta choynak, yuzta paxta gulli piyola taqsimchasi bilan. — N. Aminov, Qahqaha

Paxta gulli choynakni oldiga tortdi. — T. Ashurov, Oq ot

ot Dukkaklilarga mansub, boʻyoqchilikda xomashyo sifatida ishlatiladigan buta.

sft. Paxtasi boʻlgan, paxta solingan.

Paxtali shim. Paxtali chopon.

Ochil esa yoqasi va yenglariga qoʻngʻir kleyonkadan jiyak qoʻyib tikilgan eski paxtali fufaykada edi. — P. Qodirov, Uch ildiz

Saodat kampir paxtali nimchasini olib kiydi. — Saodat

ot 1. esk. Paxta tozalash va paxta savdosi bilan shugʻullangan boy.

Dada, endi paxta zavodi qurmasak boʻlmaydi. Modomiki, paxtachi boʻldim, zavodsiz iloj yoʻq. — Oybek, Tanlangan asarlar

2. s.t. ayn. Paxtakor.

Kampirning bir qizi kolxoz raisi bittasi kolxozning sut fermasida ishlaydi, oʻgʻli tajribakor paxtachi. — Gʻ. Rasul, Toʻngʻich oʻgʻil

ot Paxtani oʻtga toblab yoki qizitilgan yoqqa bulab, shishga, yaraga qoʻyiladigan isituvchi kompress.

Paxtadogʻ shishni qaytaradi.

ot 1. Chigit ekish bilan shugʻullanuvchi, paxta yetishtiruvchi kishi.

Ilgʻor paxtakor.

Oddiy paxtakor avval qanday ishlagan boʻlsa, hamon shunday, paxtaga hech qachon xiyonat qilmaydi. — Saodat

Chorvadorsan, botirsan — qoʻlda qoʻbizing bilan, Paxtakorsan, ishchisan, daryoni buruvchisan. — A. Oripov, Yillar armoni

2. sft. Chigit ekib, paxta yetishtiradigan.

Paxtakor yerlar.