Поиск

sft. 1. Ichi, ich hajmi, sigʻimi, sathi katta.

Keng uy. Keng maydon. Keng paykal. Top joyda osh yegandan keng joyda musht yegan yaxshi. — Maqol

Ichkari-tashqari dangʻillama hovli. Ichkari hovlining sahni keng. — Oybek, Tanlangan asarlar

Odamlar sahnga keng davra qurib oʻtirdilar. — M. Ismoiliy, Fargʻona tong otguncha

Togʻ etagin tutib yotar keng paxtazor. — Guldasta

2. Eni, koʻndalang oʻlchami katta; enli, serbar.

Keng yoʻl. Keng daryo. Keng bargli oʻsimliklar.

Orasidan qoʻqonarava bemalol yuradigan keng, uzun ishkomlar ikki tanobdan ortiqroq yerni ishgʻol etgan. — Oybek, Tanlangan asarlar

3. Oʻlchami moʻljaldagidan katta; katta keladigan, bemalol sigʻadigan (kiyim va uning qismlari haqida).

Keng toʻn. Keng shim. Keng yeng.

[Mingboshi] Keng, oppoq surp yaktagining barlarini ikki yoqqa yoyib, sekin-sekin lapanglab bordi. — M. Ismoiliy, Fargʻona tong otguncha

4. Tarqalish, qamrov doirasi katta; koʻp narsani oʻz ichiga olgan.

Keng imkoniyatlar yaratmoq. Keng isteʼmol mollari. Ishning koʻlami nihoyatda keng.

Muhokama qilingan masala yuzasidan keng qaror qabul qilindi. — Gazetadan

Aktrisa oʻz qahramonini keng fikrli, salobatli, ishchan, olijanob iffatli ayol sifatida tasvirlaydi. — Gazetadan

5. koʻchma Mehr-muruvvatli, yaxshilikni ayamaydigan, koʻpchilikka birdek munosabatli.

Kengga keng dunyo, torga tor dunyo. — Maqol

Xolam koʻli ochiq, keng, Ovqatni ulashar teng. — Q. Muhammadiy.

ot esk. Maʼlum xususiyati bilan shahar va qishloqdan farqlanib turuvchi, aholi yashaydigan joy; shaharcha.

[Yoʻlchi:] Eshitgan boʻlsangiz kerak, hozir koʻp shaharlarda, kent, qishloqlarda kambagʻal xalq oʻz haqini daʼvo qilish uchun shaylanmoqda. — Oybek, Tanlangan asarlar

Choʻlquvar arxitektor va injenerlarimiz bir vaqtlardagi sardobalar oʻrnida soʻlim manzilgohlar, yangi kent va shaharlar barpo etmoqdalar. — Sh. Rashidov, Yangi yer haqida soʻz

Koʻpdir mamlakatda kentlar, ovullar. — A. Oripov

sft. 1. Eng oxirgi farzand, eng keyin tugʻilgan oʻgʻil yoki qiz.

Lutfiniso erining davlatidan mumkin qadar koʻproq qoʻporib, shu kenja arzandasiga sarf qilish uchun urinar edi. — Oybek, Tanlangan asarlar

Kenja oʻgʻil Sayfulla bilan kenja qiz Masturabibi, ayvon oldiga kelgan, ust-boshi nihoyatda kir Elmurodga jirkanch bilan tikilib turardilar. — P. Tursun, Oʻqituvchi

2. Bir turdagi narsalarning paydo boʻlish, yuzaga kelish ketma-ketligida keyingisi, soʻnggisi; keyingi, soʻnggi.

Kenja shogird. Kenja kuyov.

1978 yil bahorida kenja xoʻjalikda III. R. Rashidov paxtakorlar bilan samimiy suhbat qilib, qimmatli maslahatlar berdi. — Oʻzbekiston qoʻriqlari

Shu payt eshikni sekin ochib kirib kelgan Sodiqjon boyvachchaning kenja xotini Shahzodaxon uni shirin xayollar quchogʻidan yulib tortib oldi. — K. Yashin, Hamza

3. Kenja (erkaklar ismi).

Kenia, Republik Kenia, Kenianer, kenianisch, Nairobi

1. Biror ish, harakat yuzasidan fikr-mulohaza, yoʻl-yoʻriq; maslahat

Kishining boshiga bir ish tushganda, darrov birovdan kengash va yordam soʻraydir — A. Qodiriy, Oʻtgan kunlar

Bolalarning kengashi bilan ikki boʻzni koʻtarib, shom paytida mirzoning uyiga bordim — A. Qodiriy, Mehrobdan chayon

2. Oʻzaro, birgalikdagi muhokama; shunday muhokama majlisi; yigʻilish

Ishlab chiqarish kengashi. yat Toʻmaris jang koʻrgan dono chollar, ayollarni chaqirib, kengash oʻtkaz- — M. Osim, Karvon yoʻllarida

Ana shu Boyguzardagi bir boyning uyida maxfiy guruhning kengashi boʻldi — S. Siyoyev, Avaz

3. Biror korxona, muassasa, jamiyatning farmoyish yoki maslahat beruvchi organi

Oqsoqollar kengashi. Oʻzaro Iqtisodiy Yordam Kengashi. Birlashgan Millatlar Tashkiloti Xavfsizlik Kengashi

pravleniye Oʻrmonjonni hosilot kengashining raisi qilib tayinladi — A. Qahhor, Qoʻshchinor chiroqlari

ot 1. En oʻlchami, sathning kattaligi.

Shaharning kengligi. Uyning kengligi. Koʻchaning kengligi.

Maydon ikki tanob kenglikda boʻlib, janubi qutidor va qoʻshnisining imoratlari ham shunga oʻxshash imoratlardan iborat edi. — A. Qodiriy, Oʻtgan kunlar

Bu joy tepalik oʻrtasida boʻlib, kengligi yarim gektardan ortiq emas edi. — I. Rahim, Chin muhabbat

2. Ochiq, keng boʻshliq.

Zargarov oʻsha tomonga, olis ufqlarga yastanib yotgan kengliklarga tikilgancha qoldi. — A. Muxtor, Boʻronlarda bordek halovat

Yigirmadan ortiq yosh chavandozlar togʻ bagʻridagi kenglikda u yoqdan-bu yoqqa quvlashar edi. — Mirmuhsin, Meʼmor

3. geogr. Ekvatordan meridian boʻylab ketgan va graduslar bilan ifodalangan masofa (yerdagi punktlar oʻrnini belgilash uchun xizmat qiladi).