fl. 1. Issiq taʼsiri natijasida qattiqligini yoʻqotmoq, suyuq holga oʻtmoq; yumshamoq.
Erigan poʻlat. Erigan choʻyan. Erigan sariyogʻ.
Yerlar erib, hamma yoq shilt-shilt loy, qoʻrgʻon kunguralaridagi qirovlar bugʻga aylanib, koʻkka koʻtarilmoqda edilar. — A. Qodiriy, Oʻtgan kunlar
2. koʻchma Jismonan boʻshashgan, erigan holatga tushmoq.
Yoʻl tortib — charchab kelayotgan odam emasmi, soyada erib, koʻzi uyquga borib, uxlab qoldi. — Yodgor
Tegirmonchi, goʻyo erib ketganday, boshini quyi soldi. — Oybek, O. v. shabadalar.
Uning butun vujudi eriganday boʻldi; koʻkragining allaqayeridan shuv etib koʻtarilgan bir nima tomogʻida lip-lip etdi-yu, koʻziga yosh oldi. — A. Qahhor, Qoʻshchinor chiroqlari
3. Issiqlik yoki boshqa taʼsir natijasida parchalanib yoʻq boʻlmoq, boshqa jismga aylanmoq.
Mavjlarga oq kapalaklardek qoʻnayotgan qor uchqunlari shu ondayoq jimjit eriydi. — H. Gʻulom, Mashʼal
Allaqayerda qargʻa qorlar erib ketganidan zorlanib qagʻillaydi. — Shuhrat, Shinelli yillar
Tuz edikki, erib ketamizmi? — Erib-ku ketmaymiz — A. Qahhor, Qoʻshchinor chiroqlari
Hah shumtakalar, ogʻizlaringda erib ketadigan suzma qurutni bersam, olmaysizlar, shu tosh qurutni talashasizlar. — Oybek, Tanlangan asarlar
4. koʻchma Parchalanib yoʻqqa aylanmoq; yoʻq boʻlmoq.
Suluv esini yigʻib qarasa, Erimbet joyida erib ketganday gʻoyib boʻlibdi, hech qayerda yoʻq. — A. Muxtor, Qoraqalpoq qissasi
Agar yigit-qizni haqiqiy sevgi bir-biriga bogʻlasa, uni hech qanday kuch uzolmaydi, oilada yuz beradigan baʼzi bir kelishmovchiliklar, xafaliklar ham sevgi-muhabbat haroratida erib ketaveradi. — A. Eshonqulov, Oila baxti haqida
5. koʻchma Ruhan iliqlik, yoqimlilik hissi uygʻonmoq, xush yoqmoq; shunday holatga tushmoq.
Yaxshi gaplarni tinglab, erib oʻtirgan Nuqra avval yalt etib Jalil Karimovichga qaradi. — Mirmuhsin, Nuqra
Bola kam-pirning soʻzlarini tushunmasa ham, uning issiq onalik mehridan eridi-da, quvonchidan sakrab oʻrnidan turib, kampirni quchoqlab oldi. — I. Rahim, Chin muhabbat
6. Moyillik, mehr, himmat hissi uygʻonmoq; mehri tovlanmoq.
Hozir boʻling, oʻr-toq yefreytor, goʻzal qizlar ham anoyi emas, salgina gapga erib ketavermaydi. — Z. Fatxullin, Soʻnmas yulduz
7. koʻchma s.t. Xarid qilingan narsa, yangilik, muvaffaqiyat va shu kabilar uchun ziyofat qilib bermoq; siylamoq, yuvmoq.
Nimaga bu yerda turibmiz? Oshxonaga olib kirib, bir eriyin endi sanga, jonginam! — J. Abdullaxonov, Toʻfon
— Yarimta emas, oʻnta yarimtaga eriyman! — kapitan shunday dedi-da qoʻlidan xatni yulib oldi. — O. Yoqubov, Izlayman
bugun sal erisangiz boʻlardi, oxirgi oyda oʻqigan leksiyalaringizga 4,5 ming soʻm yozib qoʻydim. — Mushtum