fl. 1. Belgilangan yoki soʻralgan (olingan, sotilgan) narxga loyiq, mos boʻlmoq.
Bu narsa necha pulga arziydi?
2. koʻchma Qiymati yoki ahamiyati jihatidan teng kelmoq, baravar boʻlmoq.
Yolgʻiz oʻgʻlingiz oʻnta yigitga arziydilar. — H. Gʻulom, Mashʼal
[Yoʻlchi] Eshikka chiqarkan, orqasidan chol soʻzlab qoldi: — Hay, oʻt yigit, haligi soʻzlaring oltinga arziydi, ammo har kimga soʻzlayverma! — Oybek, Tanlangan asarlar
3. Loyiq, munosib boʻlmoq.
Uni mukofotlasa arziydi.
[Qozi Qodirqulga:] Yuzida oz-moz chiroyi boʻlgani bilan oʻzi tagi past. Sizning ostonangizga sira arzimaydi., — Hamza, Boy ila xizmatchi
4. Oqlamoq, zoye ketmaslik.
Ter toʻkkanga arzimaydigan ish. Men sizga har qancha yaxshilik qilsam arziydi.
Aqlli kishilarning sadagʻasi ketsang ham arziydi. — A. Qodiriy, Oʻtgan kunlar
Askar bolalarni kaftimizda koʻtarsak arziydi. — Oybek, O. v. shabadalar
- Arzimaydi Rahmatga kamtarlik bilan qaytariladigan javob soʻz. Yordamlaringiz uchun katta rahmat. — Arzimaydi.