Поиск

узбекскийsakramoq, tez ketmoqрусскийпрыгатьанглийскийjump

sft. 1. 1 Ohista harakat bilan, asta, oshiqmasdan, shoshilmasdan.

Sekin yurmoq. Eshik sekin ochildi. Daryo sekin oqardi.

Raʼno sekin boshini koʻtarib kulumsidi va yuzini chetga oʻgirdi. — A. Qodiriy, Mehrobdan chayon

Qamalgan tutun juda sekin tarqalmoqda edi. — Oybek, Tanlangan asarlar

2. Bilinar-bilinmas, sezilar-sezilmas.

Sherigim meni sekin turtib imladi. Qabulxonaga chiqdik. — A. Qahhor, Bek

[Fotimaning] Oʻgʻlining sochlariga teggan barmoqlari sekin qimirladi-yu, silashga ham jurʼat etolmay, toʻxtab qoldi. — O. Yoqubov, Er boshiga ish tushsa

Atrofda tobora odam koʻpayib borar, birov unga uzoqdan taʼzim qilar, birov quyuqqina koʻrishar, notanish kishilar sekin kalla silkib qoʻyardi. — S. Siyoyev, Yorugʻlik

3. Ehtiyotkorlik bilan, asta-asta; ozor bermay, avaylab.

Yaraning lattasini sekin koʻchirmoq. Zirapchani sekin olib tashlamoq.

Talʼat piyolani sekingina stol burchagiga qoʻydi. — Oʻ. Hoshimov, Qalbingga quloq sol

4. Vazminlik bilan, hovliqmasdan, ohista.

Sekin tushuntirmoq.

Agar men bir boyning oʻgʻli boʻlsam, Nuri meni sevsa, ota-onasiga aytmaganda ham, atrofdagilarga sekin bildirgan boʻlar edi. — Oybek, Tanlangan asarlar

5. Past tovush bilan; eshitilar-eshitilmas.

— Sekin! Sekin gapir! — Hakimboyvachcha labini tishladi, — xotinlar eshitsa, gap-soʻz chuvaladi. — Oybek, Tanlangan asarlar

Alimardon sekin uf tortib qoʻydi. — Oʻ. Hoshimov, Qalbingga quloq sol

6. Oz-ozdan, astalik bilan; kam-kamdan.

Ilojsiz qolgan dehqon bahoni sekin kamaytirib, yetti soʻmga tushdi. — Oybek, Tanlangan asarlar

ot 1. din. Mazhab, maslak; asosiy, hukmron diniy yoʻnalishdan ajralib chiqqan guruh.

Sektalar odatda mavjud diniy yoʻnalishlarga qarshi muxolif harakat sifatida vujudga kelgan. — Falsafa qomusiy lugʻati

2. koʻchma Oʻz manfaatlari, fikrlari bilan cheklanib qolgan, koʻpchilikdan ajralgan kishilarning tor guruhi.

ot mat. Toʻgʻri burchakli uchburchakda gipotenuzaning oʻtkir burchakka yopishgan katetga nisbatidan iborat trigonometrik funksiya.

ot biol. Odam va hayvon organizmidagi bez hujayralari ishlab chiqaradigan va ajratadigan modda; ajralma (tupuk, shilliq, gormon va shu kabilar).

Organizmning normal hayoti uchun sekretlar muhim ahamiyatga ega. — OʻzME

ot 1. mat. Doiraning yoy va ikki radius bilan cheklangan qismi va shu shakldagi narsa.

Sektor yuzini oʻlchamoq. Doira sektori.

2. esk. Yaxlit bir hududning maʼlum radius va chegaralar bilan cheklangan qismi, alohida ajratilgan hudud.

Mudofaa sektori. Chilonzorning yettinchi sektori.

Shahar besh sektorga boʻlingan. — Gazetadan

3. Baʼzi idora va muassasalarning muayyan faoliyatga ixtisoslashgan boʻlimi.

Kadrlar sektori. Lugʻatshunoslik sektori.

Tozalik sektori yotoqxonaning ichi va tashqarisidagi ishlarga yaxshi rahbarlik qilyapti. — Saodat

4. Xalq xoʻjaligining muayyan iqtisodiy va ijtimoiy belgilar bilan ajralib turadigan qismi, sohasi.

Xususiy sektor. Davlat sektori.