Қидирув

от 1. Деворзанлик ва шунга алоқадор касбларда: девор ва шу кабиларнинг текис, тўғри чиқиши учун усталар таранг қилиб тортиб қўядиган ип, сим ва шу кабилар

Режа олмоқ. Режа солмоқ.

— Бектурди ака, — дерди у [Қозоқбой] ғишт тераётган устага қараб, — ғиштни яхши тераётган бўлсангиз ҳам, режа ипини тортиб олмаганингиз ёмон. — М. Қўшоқов, Уста йигит

2. Бирор ишни тартиби билан ва ўз вақтида бажариш учун олдиндан белгилаб олинган аниқ ёки тахминий мўлжал.

Эртанги ишга бугун режа туз. — Мақол

Бўрон режаларимизни бузолмайди, тақдиримиз ҳам бўроннинг қўлида эмас. — Ш. Рашидов, Бўрондан кучли

Адолат қизларга ўз режасини тушунтирди. — И. Раҳим, Чин муҳаббат

[Бригада аъзоларининг] Ҳар йили пахта тайёрлаш шартномавий режасини мамлакат бўйича биринчи бўлиб уддалашларига ўрганиб қолдик. — Газетадан

3. Белгили тартиб, қоида, ўлчов.

Иш режага тушди.

Бу оилада ейиш-ичиш белгили тартиб ҳам режага тобе эса-да, ҳар кун ширин-ширин овқатлар тайёрланади. — Ойбек, Танланган асарлар

Албатта, кампир келинларини рўзғордан сиқмасди. Аммо режани бузмай, масаллиқни исроф қилмай иш тутарди. — С. Аҳмад, Сайланма

сфт. 1. Маълум бир режа асосида қурилган; тартибли.

Режали иш. Режали иш бузилмас. — Мақол

Ҳар бирининг [ўт ўчирувчининг] ҳаракати чаққон ва режали. — М. Хайруллаев, Тилла маржон

2. Тежаб сарф қиладиган, режа билан иш тутадиган.

Режали аёл.

Моҳира пазанда, чаққон, саранжомли, режали келин эди. — М. Осим, Тилсиз гувоҳ

от Режа тузувчи киши.

— Ражаб-бекникидаги мажлисда, — деди заҳарханда билан [Отабек], — бу йиртқичликнинг режачи-си ким эди? — А. Қодирий, Ўтган кунлар

сфт. 1. Режа билан қилинмаган, тартибсиз.

Режасиз иш. Қолипсиз ғишт чиқмас, режасиз иш битмас. — Мақол

2. Тежаб-тергашни билмайдиган, тежамсиз.

Режасиз одам.

от айн. Газчўп 1.

фл. 1. Олдиндан режа тузмоқ; режалаштирмоқ.

У [Солижон] вақтини фаслдек, Бўлиб қўйган режалаб. — Қ. Муҳаммадий

2. Режа солиб ўлчамоқ, режа солмоқ, режа солиб иш қилмоқ.

Мактаб ер участкасини режалаш. Режалаб чигит экмоқ.

3. Тартибга, режага солмоқ, тизимга туширмоқ.