Izohli lugʻat
· yana 5 ta lugʻatda
ot Charxga bir necha marta bir tekis qilib oʻralgan va charxdan chiqarib olib taxlangan bir oʻram ip, ipak.
Uch kalava ipak.
Ustaxonaga eshik oldidagi arqonga ilingan qizil, sariq, surrang, binafsharang ip kalavalari tagidan bosh egib kiriladi. — A. Muxtor, Opa-singillar
Rang-barang ipaklarni kalavasidan chiqarib, charxda bir-ikki tovlab oladi-da, koptok qilib oʻrab qoʻyadi. — Oydin, Hikoyalar.
- Kalava chigallashmoq Hal etilishi lozim boʻlgan masala, muammo chigal tus olmoq. Sabab va natijalar bir-biri bilan shunday aralashib, shunday chalkashib ketgan ediki, u oqni oqqa, qorani qoraga ajratmoqchi boʻlgani sari, kalava badtar chigallashardi. — P. Qodirov, Uch ildiz
- Kalavaning uchi Hal etilishi, belgilanishi lozim boʻlgan masala, muammo va shu kabilardan belgi beruvchi, uni aniqlash, belgilashga yoʻl ochuvchi narsa. Buyruqlar papkasiga qarab baho berib boʻladimi odamga? Nima qilish kerak? Kalavaning uchi bormi? — A. Muxtor, TugʻilishTurgʻun bu chigal kalavaning bir uchi Qodirjonga borib bogʻlanishini sezardi. — O. Yoqubov, Togʻ qizi
- Kalavasini (kalavasining uchini) yoʻqotmoq Nima qilish, nimadan boshlash kerakligini bilmay qolmoq, ishi chigallashgan holda qolmoq. Ahmad kalavasini yoʻqotib qoʻygan telbadek anchagacha shaharda kezib yurdi. — F. Musajonov, HimmatBilasizmi, rais amaki, siz kasal boʻlgach, kalavamning uchini yoʻqotib, shunchalik parishon boʻldimki — Sh. Rashidov, Boʻrondan kuchli