фр. feuilleton — варақа сўзидан
Badiiy publitsistik janrlardan biri boʻlib, u vaqtli matbuot bilan uzviy bogʻliqlikda yashaydi. Qariyb bir yarim asrdan buyon feleton termini bir necha maʼnolarda qoʻllanib kelinadi. Mazkur termin dastlab 1800 yilda fransuz gazetalarida har xil moda, teatr reklamalari va eʼlonlari bosiladigan maxsus qoʻshimcha varaqalarga nisbatan qoʻllanilgan. Keyinchalik bunday axborotlar uchun gazetalar maxsus joy (podval) ajratdilar va gazetadagi oʻsha joy feleton deb yuritildi. Keyinchalik shu joyda eʼlon qilingan qiziqarli materialga nisbatan ham mazkur termin ishlatildi. Nihoyat, feleton maxsus badiiy-publitsistik maqolaga nisbatan qoʻllanila boshlaydi. Feleton janr sifatida oʻziga xos xususiyatlarga ega. U hamma vaqt konkret tarixiy voqelik yoki shaxslar, faktlar asosida yaratiladi. Feleton oʻz xarakteriga koʻra, hajviy-salbiy hamda ijobiy boʻlishi mumkin. Hozirgi kunda hajviy feleton juda keng tarqalgan boʻlib, ularda hayotimizda uchrab turadigan nuqsonlar, illatlar fosh etiladi. Oʻzbek adabiyotida A. Qodiriy, A. Qahhor, Gʻ. Gʻulom, S. Ahmad kabi ijodkor-jurnalistlarning ajoyib feletonlari mavjud., feleton