сфт. 1. Ҳиди ёмон, ёқимсиз, қўланса.
Сассиқ газ. Сассиқ саримсоқ. Бурунни сассиқ деб кесиб ташланмас. — Мақол
— Сассиқ балчиқда ётган сассиқ тўнғиз аввал ўзини қутқарса-чи, бировнинг ғамини ейиш ўрнига! — деди Зулфизар. — К. Яшин, Ҳамза
2. Сассиқ ҳид ўрнашиб қолган; ҳавоси оғир; бадбўй.
Сассиқ ҳаммом.
Икки йилгача мана шу сассиқ баракда чириб ётамизми? — А. Мухтор, Туғилиш
Зумрад бензин анқиб турган сассиқ кабинадан сакраб тушиб, шийпондаги хотин-қизлар орасида ғойиб бўлди. — С. Сиёев, Отлиқ аёл
3. Айниб, ҳидланиб, бузилиб, чириб қолган, ачиган.
Кўкариб кетган бу сассиқ сувда бижиллаб ётган ҳар хил қуртлар, тушган ерида бир-икки қилтанглаб, дарров ўларди. — М. Исмоилий, Фарғона тонг отгунча
4. кўчма дағл. Гап-сўзи кишига ёқмайдиган; қўланса (гап, сўз, муомала ҳақида).
Сассиқ одам. Сассиқ сўз.
Эшон ҳам, отинойи ҳам иккиюзлама, ёлғончи ва сассиқ гап одамлар эди. — П. Турсун, Ўқитувчи
Мени нима учун бундай қийнайсиз Кошкийди, қорача бўлиб туғилган бўлсам, кўргами, калгами тегиб, сизнинг таънангизни, сассиқ сўзларингизни эшитмас эдим! — М. Исмоилий, Фарғона тонг отгунча
5. кўчма Бировни камситиш, ҳақоратлашни билдиради.
Оҳ болам, ёшлигим қайтиб келса, бу сассиқ чолга ўлсам ҳам тегмасдим. — С. Аҳмад, Сайланма
— Сен гапирма, сассиқ кампир, — деди Қумри, Қамчининг ёнини олиб, — эринг билан қўшмозор бўл! — Ҳ. Ғулом, Машъал
- Сассиқ алаф . Сассиқ кекирдак Овқат ҳазм бўлмаслиги натижасида қўланса ҳидли газ чиқариб кекирадиган. — Мен ҳам бугун зиёфат еявериб, жуда ҳам сассиқ кекирдак бўлиб кетдим, — деди Шум бола. — Ғ. Ғулом, Шум бола