Поиск

ot 1. sprt. Kim oʻzdi musobaqasi.

Yugurish poygasi. Avtomobil poygasi. Velosiped poygasi.

Hamma poygada marraga yetay deb qolgan chavandozning hayajoni bilan yashaydi. — S. Ahmad, Qadrdon dalalar

Mabodo poygada qatnashmasa, goʻyo otini kamsitgandek boʻlardi oʻzicha. — T. Ashurov, Oq ot

2. koʻchma Biron ish-harakat, jarayonda boshqalarga nisbatan yuqori natijalarga, koʻrsatkichlarga erishish uchun boʻlgan harakat; musobaqa.

Paxta terimida Fargʻona poyganing oldida boryapti. — Gazetadan

3. koʻchma Biror sohada bir-biridan oʻzib, ustun turish uchun boʻlgan harakat, raqobat.

Bugungi kunda yer yuzida yadro qurollari bilan qurollanish poygasiga qarshi ovoz tobora baralla yangramoqda. — Gazetadan

ot 1. esk. kt. ayn. Oyoq 1.

Pirnazar polvon qiziga bir elandi-yu, boshini chetga burdi. Ota yuzini ters burgach, Yorqinoy battar ezildi, endi u dadasining poyini quchoqlab yigʻladi. — R. Rahmon, Mehr koʻzda

Poyiga yiqilib: — Momo-qiz, men senga nima yomonlik qilib edim, — deyman. — T. Murod, Yulduzlar mangu yonadi

2. (egalik va oʻ.-n. k. affiksi bilan) Birovning ixtiyorida, qoʻlida yoki oyogʻi ostida.

Lekin aslo qilma armon, Armon qilma, gul jamol, Poyingdadir yorugʻ jahon, Keng jahonga nazar sol. — H. Sharipov.

3. Biror narsaning quyi qismi, tagi, etagi.

Ulugʻ shoir haykali poyiga mehr-muhabbat va chuqur ehtirom ramzi sifatida gullar qoʻyilmoqda. — Gazetadan

Faqat daryo labi gezarib, Yopib yotar togʻning poyini. — U. Qoʻchqor, Hayajonga koʻmilgan dunyo

Sahna-yu minbar poyida ijod ahli bilan uchrashuvga talpinib kelgan kishilar — Gazetadan

4. Juft holda ishlatiladigan narsaning har biri, bir toqasi (asosan poyabzal haqida, odatda bir soʻzi bilan ishlatiladi).

[Bir] poyi yoʻq etik. Mahsining bir poyi.

Uning bir poy paytavasi osilib, yurishga xalaqit berardi. — S. Karomatov, Oltin qum

Ochil Sharopov oʻgirilib, poygakdagi poyabzallar ichidan bir poy kavushni olib koʻrsatdi. — Sh. Xolmirzayev, Soʻnmas oʻt

Nozima dahlizda yotgan bir poy tuflisiga koʻzi tushdi. — Yoshlik

ot zid. Xonaning eshikka yaqin qismi, past tomoni; toʻr II.

Yasovul poygahdagi eshikdan Sulton Ali mirzoni boshlab kirganda, Shayboniyxon hali ham shohnishinda oʻsha joynamoz ustida oʻtirgan edi. — P. Qodirov, Yulduzli tunlar

Navoiy eshikdan kirishi bilan taʼzim qilib tiz choʻkdi va ijozatdan keyin poygahda choʻkka tushib oʻtirdi. — M. Osim, Karvon yoʻllarida

ot s.t. q. Poygah.

Gulnor oʻziga boʻlgan eʼtibordan uyalib, poygakka borib, sekin yerga qaradi. — S. Zunnunova, Olov

Nazirqul, eshonning qoʻlini olib, koʻziga surtdi-da, orqasi bilan poygakka choʻkkaladi. — S. Ahmad, Hukm

Avaz poygakka omonat choʻkkalamoqchi edi, Tabibiy uni qistab, toʻrga oʻtqazdi. — S. Siyoyev, Yorugʻlik

ot Poyga qatnashchisi; poygada qatnashadigan.

Tasavvur qiling maydon atrofidagi aylana yoʻlka boʻylab bir guruh velosiped poygachilari shamoldek yelib bormoqda. — Fan va turmush

Poygachilarning barchasiga esdalik sovgʻalari topshirildi. — Gazetadan

Tezlashtirilgan avtopoygalar uchun yaratilgan, odatda, bir oʻrinli, maxsus keng shinalarga, baland boʻlmagan silliq kuzovga, yuqori quvvatli maxsus dvigatelga ega boʻlgan avtomobil