ot 1. Baʼzi sutemizuvchi hayvonlarning oyoq uchidagi, shoxsimon moddadan tuzilgan tayanch qismi.
Otning tuyogʻi. Tuyoq tovushlari.
Loyi koʻpirib yotgan yoʻlda ot taqalari, mol tuyoqlaridan hosil boʻlgan chuqurchalarni limmo-lim toʻldirgan sargʻish zardoblar jimirlab, yoniveridan sirqib yotardi. — P. Tursun, Oʻqituvchi
Ot, eshak, mol tuyoqlarining tapir-tupuri bosildi. — S. Anorboyev, Oqsoy
2. koʻchma s. t. Uy hayvoni, mol.
Nikolay zamonida ostonam tuyoq koʻrmagan. — Oybek, Oltin vodiydan shabadalar
Chorvam bor desam degunday bu yil yana tuyoq sotib oldik. — I. Rahim, Ixlos
3. Bosh (mollarning soni haqida).
Chorva tuyogʻi koʻpaydi, mollarning naslini yaxshilash, qishlovga puxta tayyorgarlik koʻrish masalasida ham anchagina ishlar qilindi. — A. Rahmat, Ellik bir bahodir
4. koʻchma Zurriyot, tirnoq.
Siz hurmatlilarga maʼlumdir, bizning shul Otabekdan oʻzga farzandimiz boʻlmay, dunyoda oʻzimizdan keyin qoldiradigan tuyogʻimiz va koʻz tikkan orzu-havasimiz faqat shul Otabekdir. — A. Qodiriy, Oʻtgan kunlar
- Tuyogʻingni shiqillat Joʻnab qol, ket. Qani, tuyogʻingizni shiqillatib qoling! — H. Gʻulom, Mashʼal
- Hoʻkizning shoxiga ursa, tuyogʻi zirqiraydi Kimsaga aytilgan qattiq gap uning yaqinlariga ham tegadi.