Xoʻroz bilan tulki

Kechqurun namozshomda bir tulki ketayotsa, bir xoʻroz qoʻndoqda qoʻnib turgan ekan. Tulkining qorni juda och ekan. Tulki:

— Men hajdan kelayotibman. Meni ziyorat qilmaysanmi? — debdi.

Xoʻroz qoʻnoqdan tushishi bilan tulki tappa bosibdi. Shunda xoʻroz qichqirib yuboribdi. Tulki:

— Nega qichqirding? — deb soʻrabdi. Xoʻroz debdi:

— Yoshligimda dadam, seni bir och tulki yeydi, deb aytgan edi. Yana aytgan edilarki, seni yemasdan turib, mening arvohimga fotiha oʻqib, keyin yesin degandilar. Shuning uchun qichqirdim, — debdi.

Shunda tulki fotiha oʻqimoqchi boʻlib, ikki oyogʻini koʻtargan ekan, xoʻroz “pirr” etib uchib, daraxtga qoʻnib olibdi. Xoʻrozni qoʻldan chiqarib yuborgan tulki afsus yeb, oʻz yoʻliga ketgan ekan.