Sichqonsulovoy

Bir bor ekan, bir yoʻq ekan, bir zamonda bir Sichqonsulovoy oʻtgan ekan. Uning bir oʻgʻli bilan bir echkisi bor ekan. Bir kuni oʻgʻlining oʻrtoqlari, yur, oʻt teramiz, deb aytishib kelishibdi. Sichqonsulovoy oʻgʻliga: — Bor, sen ham oʻrtoqlaring bilan oʻt terib kel, — debdi. Sichqonsulovoyning oʻgʻli oʻrtoqlari bilan oʻt terishga ketibdi. Ular oʻt terishib kelayotganda yoʻlda zovur uchrabdi.

Sichqonsulovoyning oʻgʻli oʻrtoqlariga, kelinglar, zovurdan sakrab oʻtamiz, — debdi. Oʻrtoqlarining hammasi oʻtibdi. Lekin Sichqonsulovoyning oʻgʻli zovurning oʻrtasiga tushib ketibdi. Oʻrtoqlari rosa yigʻlashibdi, keyin Sichqonsulovoyga kelib:

— Oʻgʻlingiz zovurga tushib ketdi, — deyishibdi. Sichqonsulovoy toza yigʻlabdi. U yigʻlab-yigʻlab, qirq bitta soqolini yulibdi. Ertasi kuni u echkisini bogʻiga olib chiqib bogʻlabdi. Keyin echkisi Sichqonsulovoydan:

— Nega soqoling kam, — deb soʻrabdi. Sichqonsulovoy:

— Mendan hol soʻra, — debdi. Echki:

— Ha, nima boʻldi, — debdi. Sichqonsulovoy:

— Sichqonsulovoyning oʻgʻli oʻlibdi, qirq bitta soqolini yulibdi, echki shoxini sindirmaydimi? — debdi. Shunda echki shoxini daraxtga urib sindiribdi.

Sichqonsulovoyning bogʻida bir tup chinori bor ekan. U chinorga har kuni bir hakka kelib qoʻnar ekan. Echkining shoxi singanini koʻrib, chinor echkidan:

— Ha, echki, shoxing nega singan? — debdi.

Echki:

— Mendan hol soʻra. Sichqonsulovoyning oʻgʻli oʻlibdi, qirq bitta soqolini yulibdi, echki shoxini sindiribdi. Chinor bargini toʻkmaydimi? — debdi. Chinor duv etib bargini toʻkibdi.

Hakka kelib, chinorga qoʻnibdi:

— Ha, chinor, nega barging yoʻq, — debdi. Chinor:

— Mendan hol soʻra, — debdi. Hakka:

— Nima boʻldi? — debdi. Chinor:

— Sichqonsulovoyning oʻgʻli oʻlibdi, qirq bitta soqolini yulibdi, echki shoxini sindiribdi, chinor bargini toʻkibdi, hakka qanotini sindirmaydimi? — debdi. Hakka qanotini sindiribdi. Hakka har kuni daryoga suv ichgani borar ekan. Shu kuni ham boribdi. Shunda daryo:

— Ha, hakka, nega qanoting yoʻq? — debdi. Hakka:

— Mendan hol soʻra, — debdi. Daryo:

— Nima boʻldi? — debdi. Hakka:

— Sichqonsulovoyning oʻgʻli oʻlibdi, qirq bitta soqolini yulibdi. Echki shoxini sindiribdi. Chinor bargini toʻkibdi. Hakka qanotini sindiribdi, daryo suvini quritmaydimi? — debdi. Daryo suvini kamaytiribdi.

Bir choʻri har kuni daryodan suv olishga chiqar ekan. Choʻri koʻzani koʻtarib chiqsa, daryoning suvi pasayib ketibdi. Choʻri:

— Ha daryo, nega suving oz? — debdi. Daryo:

— Mendan hol soʻra, — debdi. Choʻri:

— Nima boʻldi? — debdi. Daryo:

— Sichqonsulovoyning oʻgʻli oʻlibdi, qirq bitta soqolini yulibdi. Echki shoxini sindiribdi. Chinor bargini toʻkibdi. Hakka qanotini sindiribdi. Daryo suvini quritibdi. Choʻri koʻzasini sindirmaydimi? — debdi. Shunda choʻri koʻzasini toshga urib sindiribdi. Choʻri uyga kirsa, podshoning xotini:

— Ha, choʻri, koʻzang qani? — debdi. Shunda choʻri:

— Mendan hol soʻra, — debdi. Podsho xotini:

— Nima boʻldi? — debdi. Choʻri:

— Sichqonsulovoyning oʻgʻli oʻlibdi, qirq bitta soqolini yulibdi. Echki shoxini sindiribdi. Chinor bargini toʻkibdi. Hakka qanotini sindiribdi. Daryo suvini quritibdi. Choʻri koʻzasini sindiribdi. Oyim sandigʻini sindirmaydimi? — debdi. Oyim sandigʻini bolta bilan urib sindirayotgan ekan, podsho kelib qolibdi:

— Ha, oyim, nima boʻldi? — Oyim:

— Mendan hol soʻra, — debdi. Podsho:

— Nima boʻldi? — debdi. Oyim:

— Sichqonsulovoyning oʻgʻli oʻlibdi, qirq bitta soqolini yulibdi, echki shoxini sindiribdi, Chinor bargini toʻkibdi. Hakka qanotini sindiribdi. Daryo suvini quritibdi. Choʻri koʻzasini, oyim sandigʻini sindiribdi. Podsho oʻzini pichoqlamaydimi? — debdi. Shunda podsho yonidan xanjarini olib, oʻzini oʻldiribdi.