Qumursqa

Oʻtgan zamonda bir kishi safarga chiqqan ekan. Bir soydan oʻtishga toʻgʻri kelibdi. Qish vaqti ekan. Suv muzlagan ekan. Eshakning keyingi oyogʻi muzga toyib, yiqilib beli sinibdi… U kishi xafa boʻlib, muzga qarab shunday debdi:

— Ey muz aka, sen oʻzing kimdan zoʻrsan?

Muz:

— Men zoʻr boʻlsam, quyosh meni erita olarmidi? — debdi.

Shunda u kishi kunga qarab:

— Ey quyosh, sen kimdan zoʻr? — debdi.

Quyosh:

— Men zoʻr boʻlsam, bulutlar mening yuzimni toʻsa olarmidi? — debdi.

Shunda u bulutga qarab:

— Ey bulut aka, sen kimdan zoʻr? — debdi.

Bulut:

— Men zoʻr boʻlsam, yomgʻirlar meni teshib-teshib oʻtarmidi? — debdi.

Shunda u yomgʻirga qarab:

— Yomgʻir aka, sen kimdan zoʻr? — debdi.

Yomgʻir:

— Men zoʻr boʻlsam, yerga singib ketarmidim, — debdi.

U yerga qarab:

— Yer aka, sen kimdan zoʻr? — debdi.

Er:

— Men zoʻr boʻlsam, oʻtlar teshib chiqarmidi, — debdi.

Shunda oʻtga qarab:

— Oʻt aka, sen kimdan zoʻr? — debdi.

Oʻt:

— Men zoʻr boʻlsam, mollar yulib-yulib yutarmidi? — debdi.

Molga qarab:

— Mol aka, sen kimdan zoʻr? — debdi.

Mol:

— Men zoʻr boʻlsam, boʻrilar yermidi? — debdi.

Soʻngra boʻridan:

— Boʻri aka, sen kimdan zoʻr? — deb soʻrabdi.

Boʻri:

— Men zoʻr boʻlsam, merganlar otarmidi? — debdi.

— Mergan aka, sen kimdan zoʻrsan— debdi…

Mergan:

— Men zoʻr boʻlsam, oʻq soladigan xaltamni sichqon va kalamushlar qirqib tashlarmidi? — debdi. Shunda u kishi sichqonga qarab:

— Sichqon aka, siz kimdan zoʻrsiz? — debdi.

Sichqon:

— Men zoʻr boʻlsam, qumursqalar qulogʻimdan chimchib-chimchib chaqib olarmidi? — debdi.

— Qumursqa aka, sen kimdan zoʻr? — debdi.

Qumursqa:

— Men zoʻr, men zoʻr, men zoʻr, — debdi. — Otangning olti yuz botmon bugʻdoyini olti togʻdan oshirib yeganman, pochchangning yuz botmon bugʻdoyini yetti togʻdan oshirib yeganman. Men zoʻr, men zoʻr, men zoʻr, — debdi.

— Qorning nima uchun katta? — deb soʻrabdi u kishi: — Jigarim zoʻr, — debdi qumursqa.

— Beling nima uchun ingichka? — deb soʻraganida.

— Mehnatim zoʻr! — deb javob beribdi qumursqa.

— Kallang nima uchun katta? — debdi u kishi.

— Davlatim zoʻr! Mehnatim zoʻr, davlatim zoʻr, men zoʻr, men zoʻr! — debdi qumursqa.