Qozi

Oʻtgan zamonda bir er-u xotin boʻlgan ekan, Ular bir-birlari bilan juda ahil yashar ekanlar, uylarida qoʻy-echkilari va tovuqlari koʻp ekan. Roʻzgʻorlari but, oʻzlariga toʻq yashashar ekan.

Nima boʻlibdi-yu, er-xotin arzimagan narsaga janjallashib qolishibdi. Keyin ular ajrashmoqchi boʻlishibdi va qozining yoniga borib, boʻlgan voqeani aytib berishibdi. Shunda qozi:

— Uyinglarda nimalaringiz bor? — deb soʻrabdi.

— Uyimizda mol-pol, gilam-pilam, qoʻy-poʻy, echki-pechki, tovuq-movuq kabi narsalarimiz bor, — deb javob beribdi eri.

Shunday qilib uydagi bor narsalarni shu yoʻsinda aytib chiqibdi.

Qozi:

— Boravering, men hozir boraman — debdi.

U kishi endi uyiga yetib kelgan ekan, qozi ham kirib kelibdi va narsalarni ajrim qila boshlabdi, birma-bir nomini aytib: «mol xotiningizga, pol sizga, uy xotiningizga, puy sizga, gilam xotiningizga, pilam sizga» qabilida hamma narsalarning yarmini xotiniga, ularlarning aksini eriga taqsimlabdi. U kishiga faqat keyingi narsalar tegibdi. Shunda u kishi;

— Narsalarning hammasini teng qilib boʻlishingiz kerak edi-ku? — debdi.

Qozi esa:

— Oʻzingiz aytgan narsalarning hammasini teng oʻrtasidan boʻldim, — debdi,

U kishi aytgan gaplariga pushaymon boʻlib, indamay qolaveribdi.