Qizgʻanchiq it
Bir it bor ekan, juda qizgʻanchiq ekan.
Bir kun shu it sheriklari bilan talashib kattakon bir suyakni olib qochibdi. Suv ustidagi yakka choʻpdan oʻtayotsa, suvda bir it ogʻzida katta suyak tishlab, koʻzlarini olaytirib, itga tikilib turgan emish,
It:
— Ir-ir-ir, — deb tishini irjaytirgan ekan, suv ichidagi it ham tishini irjaytiribdi.
It uning ogʻzidagi suyakni ham tortib olmoqchi boʻlibdi va: «Hap!» — deb itga tashlanibdi. «Hap» deyishi bilan ogʻzidagi suyagi, uning ketidan oʻzi ham «choʻlp» etib, suvga tushib ketibdi, Qizgʻanchiq it rosa shalabbo boʻlibdi.
