Qaldirgʻoch bilan ari

Bir bor ekan, bir yoʻq ekan. Qadim zamonda bir ilon bilan ari bolgan ekan. Ilon oʻsha zamonlarda barcha jonivorlarning podshosi ekan.

Bir kuni ilon ariga:

— Sen borib hamma jonivorlarning goʻshtidan totib koʻr. Qaysi jonivorning goʻshti shirin ekan? — debdi. Ari:

— Xoʻp boʻladi, podshohim! — deb yoʻlga tushibdi. Ari barcha jonivorlarning goʻshtidan totib koʻribdi-da, orqasiga qaytibdi. Qaytib kelayotgan ekan, qaldirgʻoch yoʻliqibdi. Qaldirgʻoch gap nimada ekanini anglab:

— Qaysi jonivorning goʻshti shirin ekan, — deb soʻrabdi. Shunda Ari:

— Odamning goʻshtidan shirin narsa yoʻq ekan, — deb javob beribdi. Qaldirgʻoch:

— Shuni bilib kelganing uchun men sening tilingdan bir oʻpib olay, — debdi. Ari tilini chiqaribdi. Qaldirgʻoch arining tilidan tishlab olibdi. Undan keyin qaldirgʻoch bilan ari ilonning oldiga borishibdi. Ilon soʻrabdi:

— Qaysi jonivorning goʻshti mazali ekan? “Ari qurbaqaning goʻshti shirin ekan, deb aytayotir”, — debdi qaldirgʻoch. Shundan keyin ilon qurbaqaning goʻshtiga oʻch boʻlib qolibdi. Shu-shu boʻlibdi-yu, odam bolasi qaldirgʻochni oʻziga doʻst tutibdi.