Noqulay maslahatchi

Qadim zamonda Noqulay maslahatchi degan bir kishi boʻlgan ekan. Xalq orasida kimning boshiga mushkul ish tushsa, shu kishini chaqirtirib kelib maslahat soʻrar, uning bergan maslahati bilan ish qilar ekan. Bir kishining jinbir shoxli hoʻkizi bor ekan. Shu hoʻkiz bir kuni boshini tandirga suqib qaytarib ololmabdi. Egasi hoʻkizning boshini tandirdan chiqazib olishning ilojini qilolmay, oxiri Noqulay maslahatchining yoniga borib, maslahat soʻrabdi. U:

— Hoʻkizning boshini kesing, — deb maslahat beribdi. Hoʻkizning boshini kesishibdi. Baribir, hoʻkizning boshi tandirda qolibdi. Yana undan maslahat soʻrashibdi. U yana maslahat berib:

— Tandirni yiqiting, shundagina hoʻkizning boshini tandirdan olasiz, — debdi.

Uning bergan maslahati bilan tandirni ham yiqitishibdi. Soʻng hoʻkizning boshini tandirdan olibdilar.

Keyin Noqulay maslahatchi shodlanibdi, oʻzini-oʻzi maqtab, «Yurtda bizlardek bir-ikki maslahatgoʻy boʻlmasa, yurt xarob boʻlgʻusudir», deb qoʻygan ekan.