Maqtanchoq gʻoz

Bir maqtanchoq gʻoz bor ekan. U gʻoz har kuni odamlar oldiga kelib, maqtanaverar ekan. Bir kuni yana maqtanib:

— Men osmonda uchaman, suvda suzaman, yerda chopaman, — debdi. Bir dono odam kelib gʻozdan:

— Osmonda uchganingda sen burgutdek ucha olasanmi? — deb soʻrabdi. Gʻoz:

— Yoʻq, — debdi. Dono odam:

— Suvda suzganingda baliqdek suza olasanmi? — debdi. Gʻoz:

— Yoʻq, — debdi. Yana dono odam:

— Yerda chopganingda otdek chopa olasanmi? — debdi. Gʻoz:

— Yoʻq, — debdi. Shunda odamlar kulishibdi:

— Hay, maqtanchoq gʻoz, hunaring oz! — deb urib, quvib yuboribdilar.

Xulosa: baʼzi odamlar ham xuddi shu gʻozdek koʻp maqtanib, dakki yeydi.