Ichak bilan pufak

Bir kuni ichak bilan pufak bahslashibdi. Pufak:

— Ichak-ichak, men seni yeyman, — debdi.

— Yoʻq, meni yeyolmaysan, — debdi ichak. Pufak ichakni yeb qoʻyibdi.

Pufak nariroq borsa, bir xoʻroz uchrabdi.

— Xoʻroz, xoʻroz, men seni yeyman, — debdi.

— Bir qichqirsam, oʻlib qolasan, — debdi xoʻroz.

Pufak aytibdi:

— Ichakni yegan seni ham yeyolmaymanmi? — deb xoʻrozni yeb qoʻyibdi va nariroqqa borib, yuqoriga koʻtarilibdi va qoʻyning oldiga tushibdi:

— Qoʻy-qoʻy, men seni yeyman, — debdi.

— Bir marab bersam, oʻlib qolasan, — debdi qoʻy.

— Ichakni yegan, xoʻrozni yegan, men seni yeyolmaymanmi? — deb pufak qoʻyni ham yeb qoʻyibdi.

Yurib-yurib pufak bir molga uchrab qolibdi.

— Mol-mol, men seni yeyman, — debdi.

Mol:

— Bir marasam, oʻlib qolasan, — debdi.

Pufak:

— Ichakni, xoʻrozni, qoʻyni yegan, nimaga seni yeyolmas ekanman? — deb molni ham yeb qoʻyibdi.

Yurib-yurib, bir otga uchrabdi va unga:

— Ot-ot, men seni yeyman, — debdi.

— Sen meni yeyman deb ovora boʻlmagin, yeyolmaysan, bir tepsam, oʻlasan, — debdi ot.

— Ichakni yegan, xoʻrozni, qoʻyni, molni yegan, seni ham yeyman, — deb otni ham yeb qoʻyibdi. Yana pufak yurib-yurib bir qushchaga uchrabdi.

— Ey, qushcha, seni yeyman, — debdi pufak.

— Bir sayrab, gavron bilan ursam, oʻlib qolasan, — debdi.

— Yoʻlda uchragan ichakni, molni, qoʻyni, otni yegan seni yeya olmaymanmi? — deb qushchani ham yeb qoʻyibdi.

Undan borib-borib, oʻtin terayotgan bir qizchaga uchrab qolibdi.

— Ey qizcha, seni ham yeyman, — debdi pufak.

— Oʻrogʻimni qorningga bir tiqib olsam, yorilib oʻlasan, — debdi qizcha.

— Yurgan yoʻlimdagi hamma uchragan narsalarni yeb kelyapman-ku, endi seni yeya olmaymanmi? — deb uni ham yeb qoʻyibdi.

Ularning hammasini yeb, pufak yana yoʻlga tushibdi, bir kosibga uchrabdi.

— Usta-usta, men seni yeyman, — debdi unga.

— Yaqinroq kelib yegin, — deb usta pufakni oldiga chaqiribdi va pufakning qornini pichogʻi bilan yorib yuboribdi, uning qornidan u yegan hamma chiqishibdi. Pufakning qornidan chiqqanlar kosibdan xursand boʻlib, joy-joylariga tarqab ketishibdi va murod-maqsadlariga yetishibdi.