Haq soʻzga zavol yoʻq

Bir bor ekan, bir yoʻq ekan, qadim zamonda aka-uka boʻlgan ekan. Ular juda inoq yashashar ekan, lekin nihoyatda kambagʻal ekanlar. Aka-uka oʻzlariga toʻq yashashni, uylanishni orzu qilar ekanlar. Buning turli yoʻllarini oʻylay boshlashibdi.

Kunlardan bir kun akasi ukasiga:

— Men bir narsani oʻyladim, — debdi.

— Ayt boʻlmasa, — debdi ukasi.

— Biz hammadan avval qovun ekib yetishtiraylik, keyin podshoga sovgʻa qilib olib boraylik. U balki bizga qimmatbaho sovgʻa berar, — debdi akasi. Ukasi rozi boʻlibdi.

Erta bahorda aka-uka qovun ekib yetishtiribdilar. Qovun juda katta, usti toʻrlagan, koʻrgan kishiga «meni ye» deb turadigandek boʻlibdi.

Aka-uka qovunni zambilga solib koʻtarib, podsho huzuriga joʻnashibdi.

Podsho «xalqim mening oldimda yaxshilab, orqamdan yomonlab yurmaganmikin, qani bir sinab koʻray-chi» deb bir darvesh qiyofasida shaharda yurgan ekan. Shunda zambil yonida ikki yigit dam olib oʻtirganini koʻrib qolibdi. Darvesh yigitlarning yoniga borib, qayerga ketayotganliklarini soʻrabdi.

— Podsho huzuriga ketyapmiz, — deb javob beribdi aka-uka.

— Zambilda nima olib ketyapsizlar? — deb soʻrabdi darvesh.

— Qovun, — debdi aka-uka.

— Buni podshoga olib borishdan maqsadlaring nima? — deb soʻrabdi darvesh.

— Podshoning oʻzi biladi, — debdi aka-uka.

— Agar podsho qovunlaringni olib, oʻzlaringni zindonga solsa, unda nima qilasizlar? — deb soʻrabdi darvesh.

— Podshoning oʻzi biladi, — deb aka-uka.

— Agar podsho qovunlaringni olib, oʻzlaringni kaltaklatib oʻldirsa, unda nima qilasizlar? — deb soʻrabdi darvesh.

— Podsho qonxoʻr, bizni oʻldirgani bilan toʻyarmidi? Uning ixtiyori oʻzida, — debdi aka-uka va zambilni koʻtarib podsho huzuriga joʻnab ketaverishibdi.

Podsho ham tezda saroyga qaytibdi. U kiyimlarini oʻzgartirib, oʻz oʻrniga borib oʻtiribdi. Shunda aka-uka taʼzim qilib, kirib kelishibdi,

— Podshohi olam, sizga sovgʻaga qovun olib keldik,— debdi aka-uka.

— Qovunni qayerda, qanday qilib yetishtirdinglar?— deb soʻrabdi podsho.

— Ozgina yerimiz bor edi, oʻsha yerda mehnat qilib yetishtirdik, — debdi aka-uka.

— Bu qovunni olib kelishdan maqsadinglar nima? — deb soʻrabdi podsho.

— Oʻzingiz bilasiz, — debdi aka-uka.

Podsho darvesh qiyofasida boʻlib yurganida bergan savollarining hammasini qaytadan bera boshlabdi. Aka-ukalar savollarga xuddi avvalgidek javob berishibdi.

Podsho yigitlardan xursand boʻlib, ularning bir soʻzligiga, toʻgʻriligiga tan beribdi. Qimmatbaho kiyimlar kiydirib, koʻpdan-koʻp sovgʻalar beribdi. Katta toʻy qilib, ikki qizini aka-ukalarga nikohlab beribdi.