Bola — podsho

Bir bor ekan, bir yoʻq ekan, oʻtgan zamonda bir podsho boʻlgan ekan. U doim maqtanib, «dunyoda mendan zoʻr podsho yoʻq» deb yurar ekan.

Bir kuni uning yaqin doʻsti saroyga mehmon bulib kelibdi. Podsho doʻstiga:

— Dunyoda mendan zoʻr podsho boʻlmasa kerak, — debdi.

— Ei taqsiri olam, xafa boʻlmang-u, sizdan ham zoʻr podsho bor, — deb uning kichik oʻgʻlini koʻtarib chiqib, yoniga oʻtqazib qoʻyibdi.

Shu payt bola otasiga:

— Suv ichaman, — debdi. Podsho darrov turib suv olib kelibdi. Oradan biroz vaqt oʻtgach:

— Ota, sut bering, — debdi bola.

Podsho tezda sut olib kelibdi. Endi kelib oʻtirgan ekan, bola yana:

— Endi suvni sutga aralashtirib bering, — deb xarxasha qilibdi.

Bu aytganini ham podsho bajaribdi. Sal vaqt oʻtmay bola yana:

— Ota endi, sutni suvdan ajratib bering, — debdi. Bu gapni eshitgan podshoning jahli chiqib ketibdi.

Oʻgʻliga qarab:

— Axir, sutny suvdan qanday qilib ajratib buladi, —debdi.

Bola esa yigʻlab, janjal qilaveribdi. Shunda podsho doʻstiga qarab, «haqiqatan ham mendan zoʻr podsho bor ekan»,degan ekan.