Bogʻ

Bir bor ekan, bir yoʻq ekan, bir podsho bor ekan. Bir kuni podsho vazirini chaqirib:

— Men senga qirq kun muhlat beraman. Shu vaqt ichida katta bir bogʻ paydo qilgin. Men shu bogʻga sayrga chiqaman, — debdi.

Vazir uyga kelib qaygʻuribdi, buni koʻrgan qizi otasidan sababini soʻrabdi.

— Ey, qizim, podsho qirq kun muhlat berdi. Shu vaqt ichida bogʻ barpo qilishni buyurdi, — debdi vazir.

— Ey, ota, shunga ham shuncha qaygʻumi?! Oʻttiz toʻqqiz kun uyda yotavering, bir kun qolganda koʻchaga chiqing, — debdi dono qizi.

Vazir muhlat tugashiga bir kun qolganida koʻchaga chiqibdi. Koʻchaga chiqsa, hammaning ogʻzida «Podsho Eram bogʻiga sayrga chiqar ekan», — degan mish-mish yurgan ekan.

— Ota, el ichida qanday gap yuribdi? — deb soʻrabdi qizi.

— Podsho Eram bogʻiga borarmish, — debdi vazir. Vazir bu mish-mishlarni podshoga borib aytibdi.

Shunda podsho Eram bogʻiga otlanibdi. Ha, el ogʻziga tushgandan keyin albatta, boriladi-da.