Bajarib boʻlmaydigan buyruq

Bir podsho vazirini chaqirib, buyuribdi:

— Bir imorat qurdirgin. Imoratning tepasi osmonga, tagi yerga tegmasin.

Vazir:

— Xoʻp, mayli. Men aytganlaringizni bajaraman. Lekin siz ham qovoqqa oʻxshagan yoʻl-yoʻl ochiq savat toʻqiting. Men ishlayotgan joyga shu savatda suyuq osh solib olib borishsin, — debdi.

Shunda podsho:

— Savatda ham hech zamonda suyuq osh turadimi, ahmoq, — deb urishibdi.

Vazir:

— Ey, podshohim, boʻlmasa, havoga imorat qurib boʻladimi, — deb podshoni mot qilgan ekan.