Yer osti suvlarining genetik turi

A.A.Karsev (1972) tasnifiga koʻra yer osti suvlari ikki: endogen va ekzogen guruhga boʻlinadi. Endogen suvlar togʻ jinslarida, magmatik oʻchoqlar va katta chuqurliklarda hosil boʻladi. Ekzogen suvlardan, asosan, sedimentogen va infiltratsion turlari ajratiladi. Sedimentogen suvlar choʻkindi jins bilan bir vaqtda hosil boʻlib, ularning tarkibi yer yuzasiga yaqin joylashgan havzalar suviga toʻgʻri keladi. Infiltratsion suvlar togʻ jinslariga keyinroq shimilgan suvlardan yuzaga keladi. Neft va gaz uyumlarining hosil boʻlishi asosan sedimentatsion genezisli suvlar bilan bogʻliq.