Xavfli moddalar

– inson, hayvonlar va atrof muhit uchun jismoniy yoki biologik xavfga ega boʻlgan moddalar. X.m. ga portlovchi (ammonit, dinamit va boshq.), oksidlanuvchi (organik peroksidlar), oʻta alangalanuvchi (vodorod, metan, etan, etilen, uglerod oksidi, atsetaldegid, etilen oksidi), yengil alangalanuvchi (gidridlar, fosfor, erituvchilarning koʻpchiligi), alangalanuvchi (neftni haydash mahsulotlari), zaharli, qichishtiruvchi, kanserogen, ionlashtiruvchi, mutagen moddalar va boshqalar kiradi. X.m. ga maxsus tamgʻa bosilishi va yorliq yopishtirilishi kerak. Saqlash, tashish va foydalanish xavfsizlik qoidalariga rioya qilgan holda amalga oshiriladi.