Виды литературы

adabiy turlar, adabiy xillar. Tasvir prinsipi, hayotiy voqelikning qamrovi va aks etish tarzi, obrazlar xarakterini ochish imkoniyatlariga qarab barcha badiiy asarlar uch katta turga boʻlinadi: 1) Epik tur. Bu turga roman, povest, masal, hikoya, ocherk kabi janrlar kiradi. 2) Lirik tur. Bu turga gʻazal, murabbaʼ, muxammas, musaddas, musamman, ruboiy, tuyuq kabi klassik adabiyotdagi janrlar va hozirgi adabiyotdagi sheʼriy asarlarning hammasi kiradi. 3) Dramatik tur. Dramatik tur drama, komediya va tragediya kabi janrlarni oʻz ichiga oladi. Ayrim asarlar adabiy turlarning oʻzaro uygʻunlashuvi natijasida yuzaga keladi. Masalan, sheʼriy roman, nasriy nazm kabi. Bunday asarlar lirik-epik turga mansub deb yuritiladi.