Vahima, sarosima

haqiqiy yoki xayoliy xavf taʼsirida boshlanadigan va kuchli sarosima, sharoitga aql bilan va toʻgʻri baho berish hamda sharoitga qarab maqsadga muvofiq harakat qilish qobiliyatining yoʻqotilishi bilan belgilanadigan alohida inson, odamlar guruhi yoki ommaning ruhiy holati. V. xavf (aniq yoki xayoliy)dan ommaviy qochish, maʼnaviy-ruhiy holat va jangovar kayfiyatning tushib ketishi, ayrimda ongning toʻla oʻchishi, hissiy zoʻriqishning oshishi, ongsiz ravishda koʻpchilikka ergashish va taqlid qilish, ergashish va ishonish mexanizmlarining faollashuvi, tartibsiz harakatchanlik bilan ifodalanadi. Ommaviy qirgʻin qurollari yoki tabiiy yoki texnogen xususiyatli favqulodda vaziyatlarning shikastlovchi omillari taʼsirida yuzaga kelishi mumkin. V. ning oldini olishda favqulodda vaziyatlarni bartaraf etishda ishtirok etadigan tuzilmalar va aholining oʻzini yuqori maʼnaviy-ruhiy tayyorlash hal qiluvchi shart hisoblanadi.