umid

ot 1. Biror istakning amalga oshishiga boʻlgan ishonch; ishonch bilan kutish; eʼtiqod.

Sizdan umidimiz katta. Sendan umidim shumi?

Taassufki, otamning Azizbekdan boʻlgan umidi boʻshga ketdi. — A. Qodiriy, Oʻtgan kunlar

Bu kambagʻalchilik yorugʻ dunyodan boʻlgan umidimizni emas, yorugʻ dunyodan boʻlgan umidimiz bu kambagʻalchilikni yeb, kemirib tashlayotipti. — A. Qahhor, Qoʻshchi-nor chiroqlari

2. Biror narsa qilishga, biror narsaga erishishga boʻlgan ichki intilish, ichki hissiyot; istak, orzu, niyat.

Hayotni bilish va undan oʻzining loyiq oʻrnini topishga intilish — har bir kishining umidi. — Shuhrat, Shinelli yillar

Oʻzganiki boʻlsa ham, oʻgʻil qilib olaylik, degan umidda bola qidirib yuribmiz. — I. Rahim, Chin muhabbat

Qizga ota-onasi katta umid bilan Subh deb nom qoʻygan ekanlar. — Mirmuhsin, Al Mahdiy

3. Umid bogʻlamoq Orzu qilgan narsaning amalga oshishiga, bunda birovning koʻmagiga umid bilan qaramoq.

— Kim agar gʻalabaga umid bogʻlasa, albatta, gʻolib keladi, — dedi Joʻraxon. — Nazarmat, Joʻrlar baland sayraydi

Bobur mirzo hali yoshlar. Men ham shu zotga umid bogʻlagan edim — P. Qodirov, Yulduzli tunlar

4. Umid (erkaklar ismi).