туғилмоқ

фл. 1. Туғмоқ феълининг ўзлик нисбати.

Чала туғилган бола. Бир онадан туғилган ака-ука. Ишчи оиласида туғилган киши.

Бир онадан алвон хил бола туғилади деганларидек, Анварнинг яратилиши оғаларига нисбатан бошқача эди. — А. Қодирий, Меҳробдан чаён

Биз теги олтинсойлик бўламиз. Мен ҳам шу ерда туғилганман. — Ш. Рашидов, Бўрондан кучли

2. Кўчма Юзага келмоқ, пайдо бўлмоқ.

Бизда бир фикр туғилди. Унда нотўғри таассурот туғилибди.

Журналнинг номи Маориф ва ўқитувчи эди. Адолатнинг кўнглида уни ўқишга иштиёқ туғилди. — С. Зуннунова, Гулхан

Муттасил олиб борилган изланиш ва тадқиқотлар натижасида грипп -ни қўзғатувчи омилларни аниқлаш имконияти туғилди. — Фан ва турмуш