туб
tubтуб
от 1. Таг, ост.
Пақирнинг туби. Денгиз туби.
Саккиз булдозер канал тубини ўйиб, машина хартумига қамраб олган тупроқни юқорига суриб чиқарарди. — Ўзбекистон қўриқлари
Боғнинг этак томони чуқур жарлик. Унинг тубида бир тегирмонча сув қишин-ёзин тўхтамай оқиб ётади. — М. Осим, Тилсиз гувоҳ
2. Кўчма Пировард натижа, охир-оқибат; асос, замир.
Сабр туби — олтин. — Мақол
Ёʻқ, ўртоқ Низомов, биз таваккал қилмаймиз. Таваккалнинг туби — тош, бошингни урсанг — ёрилади. — Шуҳрат, Шинелли йиллар
Бу сўзларнинг тубида жуда катта рашк борлигини сездим. — М. Қориев, Ойдин кечалар
3. Моҳият эътибори билан асосий бўлган; асл, бирламчи.
Ёрдамчи ва шахсий хўжаликларни ривожлантириш кундалик турмушимизнинг туб масалаларидан бўлиб турибди. — Муштум
Адиб, ҳаётга фаол муносабатда бўлиш — ёзувчи меҳнатининг туб моҳияти, деб ҳисоблаган. — Газетадан
4. тлш. Қисмларга бўлинмайдиган, ясама бўлмаган.
Туб сўз. Туб терминлар.
Содда терминлар ўз ўрни билан иккига бўлинади: туб ва ясама терминлар. — ЎТА
- Туб жой Ўзи яшайдиган ер, жой; асл ўзига мансуб жой. Туб жой итидан кўра мусофир итнинг қутургани ёмон бўлади — А. Қаҳҳор, Ўтмишдан эртаклар
- Туб кон Ер ости кони. Ҳозир биз асосан туб конларни излаб топишимиз керак, назаримда. — С. Кароматов, Олтин қум
- Туб қўймоқ Асос олиб ўрнашмоқ, барқарор жойлашмоқ. Бу қишлоқ сувини бир ичган одам, тамом, шу ерда туб қўйиб, илдиз отиб кетмай иложи ёʻқ. — Ф. Насриддинов, Олтин одамлар
- Туби очилди [Тантибойвачча] Биринчидан, ишнинг туби очилишидан ваҳимага тушди. — Ойбек, Танланган асарлар
- Тубига етмоқ
- Қалб (ёки кўнгил, юрак) туби Қалбнинг энг чуқур, нозик ери. Шу митингда Мурзин ҳам бор эди. Роса қулоқ солиб тинглади. Қалби тубида қандайдир куч уйғонди. — Шуҳрат, Шинелли йилларЭлмурод унинг ёнида ўтирар ва бу сўнгги кунда унга нимадир дегиси келар, лекин кўнглининг тубида йиғилган гапларини ифодалашга пайт ҳам, сўз ҳам тополмас эди. — П. Турсун, Ўқитувчи