тасвир

от 1. Бирор нарсанинг ўйма, қуйма ёки чизма шакли; расм, сурат.

График тасвир.

Ҳиротда жангномалар ичига сурат чизиш одат тусига кирган, мавлоно Беҳзод чизган Алишер Навоий ва Ҳусайн Бойқаро тасвирлари расмий доираларда шуҳрат топган эди. — П. Қодиров, Юлдузли тунлар

Бу дафтарда Бухородаги бир неча мадрасаларнинг ҳам тасвири бор — Мирмуҳсин, Меъмор

Лола янглиғ оразингни мен кўриб тасвирда, Мубтало бўлмоқлиғим ёзмиш экан тақдирда. — Ҳамза

2. Нарса, воқеа-ҳодиса ва шу кабиларнинг бадиий ифодаси, тавсифи.

Бобурномани варақлар экансиз, ўрни-ўрни билан табиат манзаралари чизилган лавҳаларга, табиий ҳодисалар тасвирига дуч келасиз. — Фан ва турмуш