Сувни хлорлаш

зарарсизлантириш (дезинфексия) мақсадида ичимлик ва оқова сувларга хлор билан ишлов бериш. Ичимлик сувларини озонлаштириш (озон билан ишлов бериш) маъқулроқдир, чунки С.х. айрим ҳолларда мутагенлар ва кансерогенлар ҳосил бўлишига олиб келади.

сувни хлор ва унинг бирикмалари билан ишлаш. Сувни зарарсизлантиришнинг энг кенг тарқалган усули; озод хлор ва унинг бирикмаларининг микробларнинг фермент тизимини эзиш, оксидлаш-тиклаш жараёнларини катализация қилиш қобилиятига асосланган. Ичимлик сувини зарарсизлантириш учун хлор, хлор икки оксиди, хлорамин ва хлорли оҳак қўлланилади. Сув хлорланганидан сўнг унга тушган микробларни ёʻқ қилиш учун хлорни ортиғи билан (қолдиқ хлор) қўшилади. Айрим ҳолларда сувни иккиланган хлорлаш ўтказилади: тозалашга қадар (дастлабки С.х.) ва ундан кейин (якуний С.х.), сув хлорланганидан сўнг унда ёқимсиз ҳид ва таъм бериши мумкин бўлган моддалар бўлса, С.х. дан аввал аммиак ёки аммоний тузлари билан ишлов берилади. Ичимлик сувини дала шароитида зарарсизлантириш, оқова сувларни, сузиш бассейнлари сувини зарарсизлантириш, рангини ёʻқотиш учун ҳам хлорлаш қўлланилади.